AKU bllokon 1 ton mish në Pogradec – Tregtohej në kushte të këqija higjieno-sanitare dhe pa kontroll veterinar
Autoriteti Kombëtar i Ushqimi vijon aksionet për sigurinë ushqimore nëpër thertore, duke konfiskuar kësaj radhe në Pogradec gati 1 ton mish viçi dhe lope, i cili tregtohej në kushteve të rënda higjieno-sanitare. Mësohet se subjekti nuk kishte asnjë dokumentacion për kontrollet veterinare dhe sigurinë e produktit.
Aksioni u zhvillua gjatë orëve të para të mëngjesit në një ambient të paregjistruar, ku shtetasi I.M u kap në flagrancë duke kryer therrje të jashtëligjshme. Produkteve të bllokuara, 9 karkasa viçi me peshë 655 kg, një karkasë lope me peshë 205 kg si dhe 35 kg të brendshme u mungonte dokumentacioni shoqërues, vula veterinare, kuponi tatimor etj.
Krahas bllokimit të produktit, AKU mori edhe masën administrative me gjobë prej 500 mijë lekësh, si dhe ndalimin e menjëhershëm të aktivitetit.
AKU u bën thirrje konsumatorëve të jenë të kujdesshëm në blerjen e produkteve shtazore, duke kërkuar informacione në pikat e shitjes së mishit, që të jetë i vulosur, të jetë i shoqëruar me certifikatë veterinare dhe kuponin tatimor.
Më herët gjatë muajit Korrik, AKU bllokoi dy konteinerë me 50.2 tonë mish me origjinë nga Brazili, për shkak se mostrat u konstatuan me prezencë të salmonelës.
SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.