Alarm për teknologjiket – Lufta tregtare do t`i zbresë me “këmbë në tokë”

Aksionet e kompanive teknologjike, kryesisht ato amerikane, deri më tani kanë rezultuar imune ndaj tensioneve tregtare globale. Por, nëse do të vijojë edhe raundi i dytë i luftës tregtare mes Kinës dhe Shteteve të Bashkuara, pra vendosja e tarifave shtesë nga Donald Trump, atëherë, sektori i teknologjisë dhe kompanitë kryesore të saj mund të bien me këmbë në tokë.

Ta paktën këtë paralajmërojnë analistët dhe ekspertët e tregut. Investitorët në përgjithësi janë të predispozuar të reagojnë pozitivisht ndaj çdo shenje të përmirësimit të situatës, dhe kjo duket se ka qenë arsyeja kryesore se përse aksionet e kompanive të teknologjisë në Shtetet e Bashkuara të Amerikës janë izoluar disi nga tensionet globale.

Por, tanimë këmbanat e alarmit kanë filluar që të bien. Microsoft, Amazon, Walmart, Apple, etj kanë dalë haptazi kundër tarifave të reja. Gjatë Shtatorit, indeksi i teknologjisë i Standard and Poor`s 500 ka pësuar një rënie të lehtë prej 1.2%, ndërkohë që i gjithë S&P 500 ka rënë me vetëm 0.1%. Në të njëjtën situatë janë edhe kompanitë e mallrave të konsumit. Kjo javë pritet të ketë luhatje të madhe të aksioneve në këta sektorë.

Roel Korkuti/SCAN

*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.