Alarm për thatësirën në Itali – Dëmi në bujqësi llogaritet 2 miliardë euro

Nga Lombardia në Sicili, duke kaluar në Piemonte, Veneto, Emilia – Romanja, Abruzzo, Puglia dhe Kalabria: thatësira është kthyer në problemin më të madh për agrokulturën italiane, duke shkaktuar dëme që vlerësohen deri në 2 miliard dollarë, për shkak të reduktimit të të korrave. Ndërkohë presidenti i rajonit të Piemontes i ka dërguar Romës kërkesën për shpalljen e gjendjes së jashtëzakonshme.

Por dhe në Lombardi situata është serioze aq sa është kërkuar dhe racionimi i furnizimit me ujë dhe energji elektrike.

Thatësira ka krijuar një situatë dramatike në veri të Italisë ku nuk ka pasur reshje shiu prej 112 ditësh, dhe me lumin Po që regjistron nivelin më të ulët të 70 viteve të fundit. Temperatura rekord deri në 4 gradë më shumë se mesatarja, ka bërë që kryebashkiakët e zonave të prekura të marrin vendime të pamenduara më parë. Si për shembull reduktimi i furnizimit për familjet me ujë dhe energji elektrike; mos përdorimi i ujit për agrokulturën dhe mbrojtja e prodhimit të energjisë elektrike.

Në Veneto dhe Emilia Romanja, me qindra komuna po përdorin autobote për të furnizuar banorët me ujë, dhe njëkohësisht kanë urdhëruar racionimin duke ndërprerë furnizimin gjatë natës. Kryebashkiakët i kërkojnë qeverisë që të urdhërojë territoret me liqebe dhe male të ruajnë ujin duke mos e shpërdoruar atë si dhe ta përdorin kryesisht për banorët dhe agrokulturën dhe jo për qëllime energjitike.

Sipas ekspertëve të dhënat janë alarmante: për kajsitë, qershitë dhe pjeshkët mungon 70% e volumit të ujit që duhet, për dardhat dhe mollët 88%, ndërsa për misrin 50%. Por në rrezik është dhe kultivimi i domates dhe lajthive.

Thatësira prek edhe liqenet. Për liqenet e qendrës situata nuk është e lehtë dhe e njëjta gjë vlen edhe për lumenjtë, kur nivelet e tyre ulen, përqendrimi i ndotjes rritet e nuk mund të hollohen, dhe për rrjedhojë shkaktojnë probleme për florën dhe faunën.

SCAN

*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.