Alarmi nga përmbytjet në Gjermani dhe Kinë / Reshjet e dendura ekspozojnë botën ndaj ndryshimeve klimatike
Përmbytjet vdekjeprurëse të ditëve të fundit në Kinë dhe Gjermani kanë rikonfirmuar se ndryshimi i klimës po e bën motin gjithmonë e më ekstrem në të gjithë globin. Të paktën 25 persona humbën jetën në provincën Henan në Kinën qëndrore. Përmbytjet vijnë vetëm pak disa pasi vërshimi i ujit në Gjermani shkaktoi të paktën 160 viktima dhe 31 në Belgjikë. Katastrofa ka përforcuar mesazhin se nevojiten ndryshime të rëndësishme për të qënë të përgatitur në të ardhmen. Analistët shprehen se, qeveritë duhet së pari të kuptojnë se infrastruktura që kanë ndërtuar në të kaluarën është shumë e brishtë ndaj ngjarjeve ekstreme të motit. Në Europë, ndryshimi i klimës ka të ngjarë të rrisë numrin e stuhive, që mund të sjellin përmbytje si në Gjermani dhe Belgjikë. Për shkak të ndryshimit të klimës, deri në fund të këtij shekulli stuhi të tilla mund të jenë 14 herë më të shpeshta se aktualisht. Si në Europë ashtu edhe në Kinë, katastrofat e fundit u pasuan nga një periudhë e gjatë me rreshje të dendura shiu. Në rastin e Kinës, rreshjet e një viti ranë vetëm brenda 3 ditësh. Në këtë situatë, masa të tilla si përmirësimi i qëndrueshmërisë së ndërtesave, ngritja e brigjeve të lumenjve apo përmirësimi i sistemeve të kullimit nuk janë të mjaftueshme për të shmangur efektet e përmbytjeve të mëdha. Gjithashtu, edhe sistemet e paralajmërimit, që u kritikuan shumë në Gjermani pasi i dhanë njerëzve shumë pak kohë për të reaguar, duhet të përmirësohen.
Lidion Kulla – SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.