Alarmi për autizmin – Rritet numri i të prekurve, 30-40 për qind çdo vit

Numri i personave të prekur nga autizmi po rritet me shifra alarmante nga viti në vit, me shifra që regjistrohen 30-40 për qind. Shifrat janë bërë me dije në Komisionin Parlamentar të Shëndetësisë, nga grupet e interesit dhe institucionet shtetërore në kuadër të Ditës Botërore të Ndërgjegjësimit mbi Autizmin.

Shefi i Shërbimit të Psikiatrisë, Ariel Çomo, ka theksuar se teknologjia e ndërhyrjes është në standarde mjaft të mira, por duhet zgjeruar dhe se spitalet pediatrike duhet të kenë një nyjë shërbimesh sa i përket autizmit.

Shoqatat kanë ngritur si shqetësim mungesën e fondeve nga shteti për të ndihmuar të prekurit për marrjen e shërbimeve.  Ndërsa, zëvendësministrja e Shëndetësisë dhe Mbrojtjes Sociale, Bardhylka Kospiri ka theksuar se është në fazë zbatimi ligji i ri i shërbimeve sociale, ku do të krijohet fondi social për mbështetjen e kësaj kategorie.

Shenjat e para të çrregullimit të spektrit autik shfaqen midis moshës 1-2 vjeç dhe diagnostikimi final bëhet mes moshës 2-4 vjeç.

Elisabeta Dosku/SCAN

*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.