“Alitalia” drejt falimentit – Referendumi brenda kompanisë, “jo” planit të shpëtimit
67% e rreth 10 mijë punonjësve të Alitalia-s i thanë jo marrëveshjes paraprake të nënshkruar mes sindikatave dhe grupimeve profesionale me Ministrinë e Zhvillimit Ekonomik.
Rezultati përkthehet në kaos total, dhe i hap rrugën vetëm dy skenarëve; falimentit dhe shtetëzimit. Por, skenari i shtetëzimit ka shumë pak gjasa të realizohet pasi është hedhur poshtë vazhdimisht nga qeveria italiane.
“Keqardhje dhe shqetësim për rezultatin e referendumit që vë në rrezik planin e rikapitalizimit të kompanisë. Në këtë pikë, objektivi i qeverisë, në pritje të asaj që do të vendosin ortakët e Alitalias është ai që të ulen në minimum kostot për qytetarët italianë dhe udhëtarët”, deklaruan në një komunikatë të përbashkët Ministri i Zhvillimit Ekonomik, ai i Transportit dhe ai i Punës.
Në pritje të rezultatit të këshillit administrativ, skenarët janë të paktë, pasi likuditeti po mbaron dhe shumë shpejt nuk do të ketë më para as për të paguar furnitorët dhe pagat e punonjësve.
Zgjidhja më e pranueshme për momentin duket kërkesa për një administrim të jashtëzakonshëm. Aksionerët e kanë kushtëzuar injektimin e kapitalit shtesë me marrëveshjen e sindikatave dhe ministrisë, që tashmë u refuzua nga punonjësit.
Qeveria ka deklaruar shprehimisht se nuk ka një plan B. Alitalia do mbetet private dhe nuk është opsion rruga e shtetëzimit, për shkak të rregullave europiane, dhe historisë së shtetëzimeve në sektor, një dështim i padiskutueshëm.
Roel Korkuti/SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.