Amazon Echo vjen edhe në Shqipëri – Kompania zgjeron shërbimin në 80 vende të botës

Gjigandi amerikan i shitjeve online, Amazon, ka vendosur të zgjerojë shtrirjen e pajisjes “Echo”, altoparlantit inteligjent, i cili kontrollohet me anë të zërit.

Pajisja do të prekë tanimë 80 vende më tepër, në të cilat bën pjesë edhe Shqipëria, Greqia, Maqedonia, Mali i Zi dhe Serbia.

Tashmë shërbimi është bërë me të vërtetë global, por me disa mungesa. Amazon Music Unlimited do të shtrihet në vetëm 28 vende të tjera, çka do të thotë se përdoruesit e Echo duhet të zgjedhin aplikacione të tjera si galeri për këngët e tyre. Alternativa të tilla mund të jenë Spotify, Pandora, etj.

Echo mundëson komunikimin me asistenten me inteligjencë artificiale të quajtur “Alexa”. Duke përmendur këtë emër, pajisja zgjon opsionin për marrjen e komandave si luajtja e muzikës, krijimi i listave, vendosja e alarmeve, leximi i audiolibrave, si edhe ofrimi i informacionit në kohë reali mbi motin, trafikun etj.

Asistentja Alexa është në gjendja edhe të zhvillojë biseda me përdoruesin, teksa ofron edhe përgjigje për pyetjet më ekzistencialiste.

Pajisja kushton rreth 79 dollarë në faqen zyrtare dhe vjen në disa ngjyra dhe dizajne. Megjithatë opsioni për dërgimin në Shqipëri nuk është aktivizuar ende, çka ngre pyetje për mënyrën se si shqiptarët do të pajisen me këtë pajisje.

A.H./SCAN

*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.