Amazon ka spiunuar punëtorët e saj europiane më aktivë politikisht për vite me radhë – Arsyeja
Punonjësit e Amazon që janë anëtarë të sindikatave ose lëvizjeve të ndryshme të organizuara monitorohen me ngulm nga kompania sepse ata vlerësohen si të rrezikshëm për integritetin dhe efikasitetin e kompanisë. Në fakt, sipas qindra raporteve të marra nga Motherboard, por që nuk janë publikuar ende, analistët në Qendrën Operative të Sigurisë Globale, seksioni i kompanisë përgjegjëse për mbrojtjen e punonjësve, furnizuesve dhe aseteve, kanë monitoruar privatësinë e qindra mijëra punonjësve për vite me radhë. sepse konsideroheshin si kërcënim.
Email-et e brendshme zbuluan se si të gjithë anëtarët e divizionit të inteligjencës Amazon marrin azhurnime të vazhdueshme mbi aktivitetet e organizatës së punonjësve në magazina. Duke përdorur rrjetet sociale, kompania monitoron punonjësit që bashkohen me lëvizjet mjedisore në Europë sepse i percepton këto grupe si një kërcënim për operacionet e saj. Në fakt, analistët marrin shënim për datën, kohën, vendin e saktë, numrin e pjesëmarrësve në një ngjarje dhe në disa raste edhe shkallën e pritshme të pjesëmarrjes për një ngjarje specifike të organizuar nga punonjësit e ndërmarrjes, të tilla si, për shembull, greva ose shpërndarje e fletëpalosjeve.
Në përgjithësi, dokumentet ofrojnë një këndvështrim të privilegjuar mbi sistemin e mbikëqyrjes së brendshme të ndërmarrjes, e cila vazhdimisht është përpjekur të shtypë mospajtimin e punonjësve duke u përpjekur, për shembull, të shpifë për punëtorët që përpiqeshin të organizoheshin me kolegët e tyre. E gjithë kjo, siç raportohet nga Motherboard, duket se është e motivuar për të parandaluar çdo ndërprerje në dorëzimin dhe klasifikimin e porosive të marra nga platforma. Në fakt, siç thuhet në dokumente, kompania duhet të “nxjerrë në pah rreziqet e mundshme që mund të ndikojnë në operacionet e Amazon, në mënyrë që të përmbushë pritshmëritë e klientëve”.
Sipas asaj që del nga dokumentet, kompania do të kishte punësuar agjencinë hetimore Pinkerton, e cila u bë e famshme në mes shekujve XIX dhe XX në Amerikë sepse siguronte staf për të infiltruar në organizatat sindikale dhe për të frikësuar punëtorët. Akuzat e mohuara nga Amazon e cila u përgjigj, si vijon: “Ne kemi bashkëpunime tregtare me kompani të specializuara për arsyet nga më të ndryshmet, por ne nuk i përdorim partnerët tanë për të mbledhur informacione për personelin. Të gjitha aktivitetet që ne ndërmarrim janë plotësisht në përputhje me ligjet lokale dhe kryhen me mbështetjen e autoriteteve lokale ”.
Deri kohët e fundit, dihej pak për strategjitë e Amazon për të kundërshtuar veprimet sindikale, megjithëse kishte pasur raporte që e përmendnin atë qartë për vite me radhë. Sidoqoftë, tema duket se është bërë më e popullarizuar, veçanërisht kur pas një thirrje publike, kompania hoqi dy oferta pune për analistët e inteligjencës, puna e të cilëve ishte të monitoronin “kërcënimet e sindikatës”.
Në përgjigje të akuzave, zëdhënësi i Amazon Lisa Levandowski tha, “Si çdo kompani tjetër përgjegjëse, ne ruajmë një nivel sigurie brenda operacioneve tona për të ndihmuar në mbajtjen e punonjësve, ndërtesave dhe inventarit tonë të sigurt. Çdo përpjekje për të sensacionalizuar këto aktivitete ose për të sugjeruar diçka të pazakontë ose të gabuar është e papërgjegjshme dhe e pasaktë ”.
Në dritën e gjetjeve, Stefan Clauwaert, këshilltar për të drejtat e njeriut në Konfederatën Europiane të Sindikatave, tha se veprimtaritë e inteligjencës së Amazon mund të shkelnin konventat e Komitetit Europian dhe standardet e punës. Pasi u garanton punëtorëve lirinë për t’u bashkuar me sindikatat, të drejtën për t’u organizuar dhe për të negociuar kolektivisht për të drejta më të mëdha. Përveç kësaj, mund të ketë edhe çështje të privatësisë, pasi që GDPR kërkon që kompanitë të zbulojnë se çfarë të dhënash personale mbledh dhe pse. “Ndërsa mund të kemi përshtypjen se gjithçka që shkruajmë në Amazon është të paktën e ruajtur diku për rishikim, është e rëndësishme që ju të dini që ju jeni vëzhguar në mënyrë të qartë”, thuhej në një email të dalë nga Amazon dhe në zotërim të Motherboard.
Tashmë nën qendër të vëmendjes europiane të antitrustit, në tetor Amazon mori një letër të hapur të nënshkruar nga parlamentarja europiane Leila Chaibi dhe nga 37 parlamentarë të tjerë, përfshirë italianin Brando Benifei. Letra lexon “Rritja eksponenciale e Amazon në fitime që nga fillimi i pandemisë nuk e përjashton atë nga respektimi i parimeve themelore ligjore të punëtorëve”. (Wired)
Edel Strazimiri / SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.