Ambasadori turk në SCAN: Po bëjmë përpjekje për të kapur objektivin 1 miliardë dollarë me shkëmbimet tregtare
Ambasadori i Turqisë në Shqipëri, Murat Ahmet Yoruk në një intervistë në emisionin ‘PASSPORT’ të gazetarit Arbër Hitaj në RTV SCAN, thotë se volumi tregtar mes vendeve tona shkon në 520 milionë dollarë për vitin 2019, me një rritje prej 60 milionë dollarë krahasuar me 2017.
Ambasadori thekson se investimet turke në vendin tonë shkon në 3 miliardë dollarë, por ka ende potencial në sektorë të ndryshëm.
“Ne kemi një vëllim investimi prej 3 miliardë dollarësh në Shqipëri. Firmat turke e kanë gjetur pozitive të investojnë në Shqipëri, të fillojnë një biznes dhe të krijojnë marrëdhënie biznesi me këtë vend, i cili ka arritur një volum investimi prej rreth 3 miliardë dollarë. Prania ekonomike dhe tregtare e Turqisë këtu me ka habitur dhe mua. Rreth 435 kompani veprojnë në Shqipëri.
Fushat në të cilat veprojnë kompanitë tona janë shumë strategjike për Shqipërinë. Ne kemi investime në energji, bankë, telekomunikacion, miniera, infrastrukturë, shërbime kontraktuese, aviacionin civil dhe arsim. Vëllimi ynë tregtar është rreth 520 milionë dolarë. Në vitin 2017, kjo shumë ishte 460 milionë dollarë amerikanë, një rritje prej 60 milionë dollarësh.
Megjithatë, potenciali i këtyre dy vendeve nuk është i mjaftueshëm. Kur presidenti ynë vizitoi Shqipërinë në vitin 2015 dhe kur u takua me presidentin Nishani, dy presidentët vendosën që vëllimi tregtar mes dy vendeve të ishte 1 miliardë dollarë. Ne po bëjmë përpjekje për të kapur këtë objektiv prej 1 miliardë dollarësh. Për të arritur këtë qëllim, ne duam të përdorim disa mekanizma në mënyrë më efektive. Ne filluam negociata për të shqyrtuar Marrëveshjen e Tregtisë së Lirë (MTL). Ne kemi Komisionin tonë të Përbashkët Ekonomik (KEK).
Ne kemi në plan të shkëmbejmë pikëpamjet me KEK-un në periudhën e ardhshme. Disa nga 435 kompanitë tona kanë funksionuar në Shqipëri që nga vitet 1990. Në periudhën e ardhshme, ata do të vazhdojnë të bëjnë biznes në Shqipëri me investime të reja. Qe nga viti 2014 në Shqipëri ne kemi një organizatë shumë të rëndësishme Dhoma e Tregtisë dhe Industrisë Shqiptare-Turke (ATTSO) .
Kjo dhomë është në rritje dhe bëhet më e fortë çdo ditë. Kur u themelua, kishte vetëm 10 anëtarë turq dhe 4 shqiptarë. Sot ajo ka 64 anëtarë. ATTSO është një qendër e rëndësishme tërheqëse për anëtarët e saj, duke krijuar vende pune dhe mundësi biznesit. Për rritjen dhe zhvillimin më aktiv të ATTSO jep mbështetje dhe vetë kryeministri Rama dhe qeveritarë të tjerë.
Një anketim u zhvillua në mesin e anëtarëve të ATTSO para fundit të vitit 2018. Sipas rezultateve të anketës, firmat turke kanë dy pika që duhen theksuar për të bërë biznes në Shqipëri: Së pari, firmat e kanë të vështirë të gjejnë personel të kualifikuar për të punësuar. Së dyti, ata po përjetojnë vështirësi për shkak të mos pagesës së TVSH-së në kohë. Por asnjë kompani turke nuk ka thënë se klima e investimeve dhe biznesi në Shqipëri nuk janë të përshtatshme. Ky është gjithashtu një faktor inkurajues për kompanitë turke që kërkojnë të investojnë në Shqipëri” u shpreh ambasadori turk.
SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.