Amerika dhe BE mbështesin paketën e re “Anti-KÇK”: Të vazhdojë lufta për shtetin e së drejtës
Paketa më e re ligjore, që synon goditjen e pasurisë së krimit të organizuar “Anti-KÇK” miratuar nga parlamenti ditë më parë ka marrë mbështetjen edhe të partnerëve kryesorë të Shqipërisë si Amerika dhe BE.
Nëpërmjet deklaratave në rrjete sociale dy ambasadat e rëndësishme në Shqipëri u shprehën se kjo paketë është një lajm i mirë për drejtësinë shqiptare, por se funksionet e tyre duhet të jenë në mbështetje të institucioneve të reja si SPAK dhe BKH.
Ambasada Amerikane i ka vlerësuar këto përpjekje, si mjaft të rëndësishme për të mos minuar themelet e shtetit ligjor:
“Ndërsa vazhdon zbatimi i reformave të rëndësishme të drejtësisë, Shtetet e Bashkuara mirëpresin përpjekjet e intensifikuara nga Qeveria e Shqipërisë për të parandaluar krimin e organizuar që të përdorë pasurinë e paligjshme për të minuar themelet e shtetit ligjor. Mekanizmat e përforcuar për zbatimin e ligjit duhet edhe të mbështesin institucionet e reja të drejtësisë të ngarkuara me ndjekjen penale të krimit të organizuar, edhe të harmonizohen me standardet e procesit të drejtë ligjor. Ne do të vazhdojmë ta ndjekim zbatimin e këtij ligji me interes te madh.”
Ndërkohë, Delegacioni i BE-së vlerëson se metoda e “ndjekjes së parasë” është mjaft e rëndësishme për të luftuar organizatat kriminale duke inkurajuar qeverinë të vazhdojë me përpjekjet në këtë drejtim:
“Ne do të ndjekim nga afër zbatimin konkret të aktit normativ. Është jashtëzakonisht e rëndësishme që masat e reja ligjore të zbatohen në respekt të plotë të të drejtave themelore të të akuzuarve dhe në përputhje me parimet e shtetit të së drejtës. Është gjithashtu e rëndësishme që këto masa të reja të ndiqen përmes institucioneve të krijuara nga reforma në drejtësi, në veçanti SPAK-un.
Ne vazhdojmë ta inkurajojmë Qeverinë e Shqipërisë që të rrisë më tej përpjekjet e saj për zbatimin e plotë të reformës në drejtësi dhe forcimin e shtetit të së drejtës
SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.