Amerikanët u vendosin kusht punëdhënësve për tu rikthyer në punë – Ja cili është ai
Punëtorët amerikanë po largohen nga punët e tyre në një numër rekord prej 4.3 milionë në gusht dhe 4.4 milionë të tjerë në shtator. Menaxherët në të gjithë industritë kanë probleme me punësimin, edhe pse rrisin pagat dhe ofrojnë stimuj. Por një sondazh i ri ofron mbështetje për një zgjidhje jo shumë radikale, por ende të pazakontë: javën e punës katërditore.
Studiuesit për firmën financiare Jefferies pyetën të rinjtë amerikanë (nga 22 deri në 35 vjeç) që kishin lënë punën kohët e fundit se çfarë mund të kishin bërë ish-shefat e tyre për t’i bindur ata të qëndronin. Tridhjetë e dy për qind thanë se do të kishin qëndruar nëse do t’u ofrohej një javë pune katër-ditore. Kjo ishte përgjigja e dytë më e zakonshme, menjëherë pas 43% që do të kishin qëndruar për më shumë para. Studimi zbuloi gjithashtu se 80% e të anketuarve mbështesin një javë pune katër-ditore.
Sa i përket 20% të mbetur: Vetëm 3% thanë se ishin kundër një jave më të shkurtër dhe 17% ishin “neutrale”. Ideja e një jave katër-ditore nuk është aspak e re, por pandemia dhe puna e tepërt që erdhi me të kanë rigjallëruar përkrahësit. Kur Microsoft provoi një javë më të shkurtër pune në Japoni në 2019, zbuloi se produktiviteti u rrit me pothuajse 40%.
Elephant Ventures, një kompani e inxhinierisë së softuerëve dhe të dhënave filloi testimin e një jave pune katërditore në gusht 2020 për të ndihmuar në parandalimin e rënies së punonjësve gjatë pandemisë. Veçanërisht, Elephant Ventures e ngjeshi javën e saj të punës në katër ditë 10-orëshe, por fundjava treditore u prit aq mirë, saqë kompania po e bën ndryshimin të përhershëm.(CNN)
G . D / SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.