Amerikanët votojnë/ Rezultatet nisin të publikohen në mesnatë pas një fushate të trazuar nga pandemia
Amerikanët i janë drejtuar kutive të votimit për të vendosur nëse Donald Trump apo sfiduesi Joe Biden, do të zgjidhet president, pas 4 viteve të trazuara nën biznesmenin e kthyer në politikan. Biden, kandidati demokrat dhe politikan me karrierë, ka pasur avantazh të vazhdueshëm në sondazhet kombëtare. Megjithatë, republikani Trump është afër mjaftueshëm në shtetet e betejës që të arrijë 270 votat elektorale , që duhen për të mbajtur presidencën. Mund të kalojnë ditë deri sa të bëhet e ditur, veçanërisht nëse pranohen sfidat ligjore mbi votimet postare nëse rezultati është i ngushtë. Ekzistojnë gjithashtu shqetësime për trazira në rrugë, ndërkohë që disa qytete po fortifikojnë ndërtesat në pritje të protestave, përfshirë përreth Shtëpisë së Bardhë dhe NeëYork City. Rezultatet do të nisin të dalin pas mesnatës, kur qendrat të mbyllen në shtete si Georgia, pavarësisht se rezultatet vendimtare kombëtare do të kërkojnë ditë, nëse gara është e afërt. Votimi vjen pas një fushate të mbizotëruar nga pandemia e koronavirusit, që ka lënë mbi 231,000 amerikanë të vdekur dhe miliona të papunë.
Vendi është tronditur gjithashtu nga protestat kombëtare mbi padrejtësitë racore. Biden, që e ka cilësuar garën si një referendum mbi mënyrën se si Trump ka manaxhuar pandeminë, ka premtuar një qasje tjetër për të luftuar krizën shëndetësore, ndrequr ekonominë dhe bashkuar ndasinë politike. Pavarësisht se mbi 99 milionë amerikanë kanë marrë pjesë në votime të parakohshme, fizike apo postare, dita e zgjedhjeve përbën afatin përfundimtar për votat dhe shërben si ritual për ata që shkojnë në qendra të votimit të Martën e parë të Nëntorit. Zgjedhjet kanë nxitur disa çështje ligjore nëse duhen përshtatur rregullat e votimit përballë pandemisë.
Trump ka vënë në pikëpyetje integritetin e rezultatit të zgjedhjeve për muaj me radhë, duke pretenduar se votimet me postë elektronike janë bazë e mashtrimeve dhe ka refuzuar të dorëzojë paqësisht pushtetin nëse humbet.
Klevis Llaha / SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.