AMF aderon në Memorandumin Shumëpalësh të Shoqatës Ndërkombëtare të Mbikëqyrësve të Sigurimeve!

Autoriteti i Mbikëqyrjes Financiare njofton se është bërë anëtari i 77-të që aderon në Memorandumin Shumëpalësh të Mirëkuptimit të Shoqatës Ndërkombëtare të Mbikëqyrësve të Sigurimeve (IAIS), nga 152 anëtarë të saj.

Sipas njoftimit Memorandumi Shumëpalësh i Mirëkuptimit i ndihmon mbikëqyrësit, duke përcaktuar kuadrin formal të bashkëpunimit dhe shkëmbimit të informacionit, në drejtim të mbikëqyrjes së shoqërive të sigurimit.

AMF bën me dije se për Drejtorin e Përgjithshëm Ekzekutiv të Autoritetit të Mbikëqyrjes Financiare, Ervin Mete, aderimi në Memorandumin Shumëpalësh të Mirëkuptimit të Shoqatën Ndërkombëtare të Mbikëqyrësve të Sigurimeve (IAIS) erdhi si rezultat i një procesi të gjatë të rishikimit ligjor e rregullator për Autoritetin.

Sipas informacionit të publikuar Memorandumi Shumëpalësh i Mirëkuptimit të IAIS përfaqëson një kuadër global përputhshmërie dhe konfidencialiteti, që i hap rrugën bashkëpunimit dhe shkëmbimit të informacionit mes mbikëqyrësve të tregut të sigurimeve.

“Përmes anëtarësimit në grupin e nënshkruesve të MMoU-së, ku bëjnë pjesë 77 shtete dhe etnitete (nga 152 anëtarë të IAIS), AMF mund të shkëmbejë informacion dhe të japë ose përfitojë asistencë nga nënshkruesit e tjerë, në funksion të stabilitetit financiar dhe mbikëqyrjes efektike të tregut të sigurimeve.  AMF ka aderuar në IAIS në vitin 2001,” thuhet në njoftim.

E . S / SCAN

*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.