AMF njofton: Nis zbatimi i projektit të ri të Bankës Botërore për tregjet e kapitalit
Autoriteti i Mbikëqyrjes Financiare njofton se Drejtori i Përgjithshëm Ekzekutiv i AMF-së mori pjesë në një takim online me Përfaqësuesin e ri të Përhershëm të Bankës Botërore në Shqipëri, Emanuel Salinas dhe Maryam Salim, e cila përfundon mandatin e saj 4-vjeçar si Menaxhere e Bankës Botërore në vendin tonë dhe në takim ishin të pranishëm edhe zv/Ambasadori i Zvicrës në Shqipëri, Patrik Meier, si edhe përfaqësues të tjerë të Bankës Botërore dhe Ambasadës Zvicerane.
Sipas njoftimit takimi u zhvillua në nisje të zbatimit të projektit të asistencës teknike të financuar nga Sekretariati Zviceran për Çështje Ekonomike (SECO) dhe me mbështetjen e Bankës Botërore për “Forcimin e kapaciteteve mbikëqyrëse të AMF-së për tregjet e kapitalit”.
AMF bën me dije se projekti do të shërbejë për draftimin e akteve nënligjore në zbatim të ligjit të ri për tregjet e kapitalit, fuqizimin e mbikëqyrjes me bazë rreziku, zhvillimin e kapaciteteve mbikëqyrëse, si dhe ndërmarrjen e nismave për zhvillimin e tregut të kapitaleve përmes rritjes së edukimit financiar.
Sipas informacionit të publikuar ë faqen zyrtareDrejtori i Përgjithshëm Ekzekutiv falënderoi Bankën Botërore për mbështetjen e vazhdueshme, duke theksuar rolin thelbësor që ajo ka luajtur ndër vite në rritjen e kapaciteteve mbikëqyrëse dhe përmirësimin e kuadrit rregullator të Autoritetit dhe se pjesëmarrësit në takim evidentuan progresin e bërë nga Autoriteti në drejtim të forcimit të rolit rregullator dhe mbikëqyrës.
SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.