AMF organizon për herë të parë në Shqipëri “Forumin Global 2019” të IOPS- i mbi pensionet private
Autoriteti i Mbikëqyrjes Financiare do të organizojë për herë të parë “Forumin Global 2019” të Organizatës Ndërkombëtare të Rregullatorëve të Pensioneve (IOPS). Vendimi i është bërë i ditur zyrtarisht AMF-së në fillim të këtij muaji, i cili është marrë me 22 shkurt në Irlandë, në mbledhjen e anëtarëve të Komunitetit Ekzekutiv të IOPS-it.
Sipas AMF-së, në këtë forum financiar do të marrin pjesë drejtues të lartë të institucioneve dhe autoriteteve rregullatorë nga 76 vendet anëtare të IOPS-it. Forumi Global do të zhvillohet në periudhën Tetor – Nëntor në Tiranë dhe do të bëjë bashkë ekspertët nga industria e fondeve të pensioneve, institutet kërkimore, si dhe përfaqësues nga organizatat europiane dhe ndërkombëtare të specializuar në këtë fushë.
AMF është anëtar me të drejta të plota që nga dhjetori i 2010-ës në IOPS, e krijuar në vitin 2004 me qëllim përfaqësimin e interesave e enteve rregullatorë të pensioneve private. Forumi Global organizohet çdo vit në qytete të ndryshme të botës, ku në fokus të diskutimeve vendosen zhvillimet e fundit dhe sfidat me të cilat përballen rregullatorët dhe industria e fondeve të pensioneve private vullnetare. Ndërkohë, takimi i radhës do të mbahet në datat 24-26 tetor të këtij viti në Pekin.
AMF, me mbështetjen e Autoritetit Europian të Sigurimeve dhe Pensioneve Profesionale (EIOPA) do të organizojë në kryeqytet në datat 20-21 shtator 2018 një seminar me temë “Mbikëqyrja me fokus rrezikun”, ku do të marrin pjesë përfaqësues nga vendet anëtare të EIOPA-s dhe ekspertë të tjerë të fushës.
Po ashtu, sipas AMF-së, vendi ynë do të presë për herë të parë në “Takimin e Pesëmbëdhjetë të Iniciativës për mbikëqyrjen e Sigurimeve për Vendet e Europës Juglindore, Qendrore e Lindore.” Ky takim ka për qëllim të forcojë bashkëpunimin në fushën e sigurimeve midis vendeve të rajonit.
G.D/SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.