Analiza/ Ngadalësimi ekonomik i Kinës është i vërtetë, por nuk është shkaktuar vetëm nga tarifat
Rritja ekonomike e Kinës ka rënë në nivelin më të ulët në gati tre dekada, por lufta tregtare me Shtetet e Bashkuara nuk është për t’u fajësuar.
Rritja e prodhimit të brendshëm bruto ra në 6.2% në tremujorin e dytë, më e dobëta që kur qeveria filloi të publikojë shifrat tremujore në 1992, thanë autoritetet kombëtare të statistikave këtë javë.
Pavarësisht nga një armëpushim i dakordësuar midis Trump dhe presidentit kinez Xi Jinping muajin e kaluar, tarifat e SHBA për 250 miliardë dollarë mallra kineze mbesin në vend dhe kanë goditur tashmë sektorët prodhues dhe bujqësor të Kinës.
Por analistët argumentojnë se lufta tregtare njëvjeçare nuk është zvarritja më e madhe për ekonominë e dytë më të madhe në botë. Ngadalësimi ka të bëjë shumë me një mal të borxhit që ka Kina dhe me konsumatorët e kujdesshëm.
Kina ka operuar për vite me radhë në nivele të larta borxhi, që rrjedhin nga një paketë stimuluese masive e nisur gjatë krizës financiare të 2008.
Edhe pse stimuli nxiti rritjen ekonomike, ai rezultoi në një mal borxhi prej 40 trilion dollarësh të qeverisë, borxheve të korporatave dhe familjeve me vlerë më shumë se 300% të PBB-së së Kinës që nga marsi 2019, sipas një raporti nga Instituti i Financave Ndërkombëtare (IFN) në Uashington këtë javë. Borxhi i përgjithshëm i Kinës tani përbën rreth 15% të totalit global, shtoi IFN.
Të gjitha rregullimet e ndërmarra nga qeveria kineze për të lehtësuar borxhin kanë ndikuar negativisht në ekonominë e shtetit komunist, duke zhvilluar më tej krizën e saj ekonomike.
Goditja e ekonomisë këtë vit megjithatë ka ardhur më së shumti nga konsumatorët kinezë, të cilët kanë ulur shpenzimet sepse shqetësohen për të ardhmen e ekonomisë dhe rritjen e nivelit të borxhit personal. Çmimet e larta të pronës kanë tendosur gjithashtu fuqinë blerëse të tyre.
Shitjet me pakicë u rritën me 8.4% në gjysmën e parë, nga 9% në të njëjtën periudhë të vitit të kaluar.
Shitjet e dobëta të makinave janë gjithashtu një faktor i rëndësishëm i ngadalësimit ekonomik. Shpenzimet totale për makina u rritën me vetëm 1.2% në gjashtë muajt e parë të vitit.
Në fund, mbetet për t’u thënë se, edhe pse Kina është munduar shumë të rregullojë problemet ekonomike që ajo ka, metodat e vjetra të cilat po përdor i kanë rezultuar për asgjë.
Burimi: CNN
DOSTI BANUSHI – SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.