Analizë e sezonit turistik – Klosi: 2018, bum turistësh! Të huajt gjithmonë e më pranë Shqipërisë

Ky vit ka shënuar rritjen më të madhe të numrit të turistëve të huaj që kanë hyrë në vendin tonë. Vetëm gjatë gushtit shifrat kanë treguar se numri i turistëve ishte 27% më shumë se gjatë gushtit të 2017. Treguesi më i rëndësishëm janë shifrat e shtatorit, 31% turistë më shumë se vjet.

“Ne këtë vit presim që të jenë mbi 6 milionë krahasuar me një vit më parë me 5.1 milionë shënojnë një rritje shumë më të madhe. Dhe vitin tjetër padyshim në qoftë se vazhdojmë përpjekjet tona do të shkojmë në 7 milionë mbase 7.1 apo 7.2 milionë turistë”- tha ministri i Turizmit dhe i Mjedisit, Blendi Klosi.

Turizmi 2018, përveç suksesit, shton edhe përgjegjësitë për të rritur kapacitetet sasiore dhe cilësore akomoduese që të presë numrin e madh të turistëve.Këtë deklaratë ministri Klosi e bëri gjatë analizës së sezonit turistik në Durrës, nga ku tha se ky qark i ka të gjitha komponentët e asaj që duhet bërë për turizmin në Shqipëri, nisur nga porti, kapacitetet akomoduese, agroturizmi deri tek malet dhe rrethi Krujës. Ministri Klosi tha se është rritur me 15% numrit i turistëve të huaj që futen në portin e Durrësit, çka do të thotë se të huajt janë gjithmonë e më pranë Shqipërisë.

Këto rezultate pozitive, sipas tij, tregojnë se ka ardhur koha që të ngrihet komuniteti i turizmit, me njerëz që e kanë biznes 12 mujor turizmin. Gjithashtu është një factor që tregon se është koha e duhur që të merren të gjitha masat për vitin e ardhshëm, plazhet të kenë roje bregdetare, shërbime cilësore dhe të sigurta, sinjalistikë në plazhe dhe ushqime të kontrolluara, pse jo të këtë edhe një “konkurrim” mes destinacioneve turistike të vendit.

e.t/SCAN

*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.