Anëtarët e KLGJ dhe KLP – Hidhet shorti i tretë, lista kalon automatikisht në Kuvend
Nënkomisioni i posaçëm për zgjedhjen e anëtarëve të Këshillit të Lartë Gjyqësor dhe Këshillit të Lartë të Prokurorisë ka përcaktuar me short listat përfundimtare të këtyre dy organeve. Ky është shorti i tretë për zgjedhjen e anëtarëve të këtyre dy këshillave, pasi dy të mëparshmit nuk morën 94 vota në Kuvend. Praktikisht, kjo do të jetë lista përfundimtare e KLGJ dhe KLP, edhe nëse ajo nuk miratohet me votat e deputetëve në seancë plenare.
“Në rast se Kuvendi nuk arrin shumicën prej 2/3 edhe në votimin e tretë, kandidatët e kësaj liste konsiderohen të zgjedhur. Efektivisht, lista që do të miratojë ky Nënkomision i nderuar sot, është lista përfundimtare e anëtarëve jo gjyqtarë dhe jo prokurorë që do të jenë pjesë e Këshillave Respektivë, Këshillit të Lartë Gjyqësor dhe Këshillit të Lartë të Prokurorisë.”
Ndryshimi nga lista e mëparshme ishte se nga shorti i tretë u përjashtua me votat e mazhorancës kandidatura e Kozma Janos, ndaj të cilit ka nisur një hetim i thelluar nga Autoriteti për Informimin mbi Dokumentet e ish-Sigurimit të Shtetit. Deputetët e opozitës akuzuan se lista e kandidatëve ishte tërësisht politike dhe se disa prej tyre ishin në shkelje të hapur të ligjit.
“Kandidatë të cilët janë të pastër, përfaqësues politikë, me lidhje të forta politike, me raporte të drejtpërdrejta me politikanë të lartë, kandidatë të cilët kanë probleme me dekriminalizimin, kandidatë të cilët kanë probleme me dosjet e Shërbimit të Sigurimit të Shtetit, kandidatë të cilët janë të skualifikuar nga ONM-ja që qartazi, kandidatë që për ONM-në nuk bëjnë për këto funksione sepse kanë arritje mesatare dhe Kushtetuta kërkon aftësitë më të larta në organin qeverisës, kandidatë të cilët nuk paguajnë taksat.”
Në fund shorti prodhoi këta emra: Kandidatët nga Avokatia për KLGJ: Fatmira Luli dhe Alban Toro. Kandidatët nga Pedagogët për KLGJ: Erion Muharremaj dhe Maksim Qoku. Kandidatët nga Shoqëria Civile për KLGJ: Naurela Llagami. Anëtarët jo magjistratë të zgjedhur me short për KLP: Kandidatët nga Avokatia për KLP: Znj.Nurihan Seiti (Metaj), Tartar Bazaj. Kandidatët nga Pedagogët për KLP: Gent Ibrahimi, Sandër Beci. Kandidatët nga Shoqëria Civile për KLP: Alfred Balla.
L.R/SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.