Anglia gati të “hapë dyert” për 3 milion qytetarë nga Hong Kongu – Arsyet
Boris Johnson u ka ofruar tre milion qytetarëve të Hong Kongut mundësinë për të jetuar dhe punuar në Mbretërinë e Bashkuar pasi Kina imponoi një ligj të ri të sigurisë kombëtare në rajon.
Kryeministri i Mbretërisë së Bashkuar të mërkurën i tha parlamentit se ai do të shkojë përpara me masën pasi Kina vendosi ligje të reja të sigurisë për rajonin gjysmë-autonom të Hong Kongut.
Ligjet, të cilat kundërshtohen nga Mbretëria e Bashkuar, Bashkimi Evropian dhe Shtetet e Bashkuara, janë krijuar për të eliminuar protestat antiqeveritare në rajon.
Johnson tha që imponimi i ligjit është në kundërshtim me Deklaratën e përbashkët Sino-Britanike, të nënshkruar nga Mbretëria e Bashkuar dhe Kina në 1984.
Duke shpallur vendimin, Sekretari i Jashtëm i Mbretërisë së Bashkuar, Dominic Raab tha se Mbretëria e Bashkuar “nuk do të braktisë Hong Kong-un, dhe nuk do t’i largohemi përgjegjësive tona historike ndaj njerëzve atje.”
Publiku britanik mbështet gjerësisht masën për të mirëpritur qytetarët nga Hong Kongu. Një sondazh i publikuar këtë javë nga Grupi Kërkimor i Anëtarëve Konservatorë të Parlamentit, tregoi se 61% e britanikëve e mbështesnin këtë veprim në krahasim me 11% që e kundërshtonin atë.
D.B – SCAN
Burimi: Business Insider
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.