Anijet pa ekuipazh do të mbizotërojnë së shpejti transportin detar të mallrave

Kompanitë e teknologjisë nga Google tek Apple mund të jenë duke u fokusuar tek makinat pa shofer, por në oqeane, janë anijet e automatizuara ato që mund të kenë impaktin më të madh deri në fund të dekadës.

Kompania norvegjeze Yara do të prezantojë vitin tjetër anijen e parë elektrike të mallrave. Fillimisht ajo do të ketë një ekuipazh, ndërsa deri në 2019 do të komandohet në distancë. Deri në vitin 2020 pritet që ajo të bëhet tërësisht autonome.

E quajtur Yara Birkeland, mjeti lundrues do të udhëtojë nga fabrika kryesore e Yara në Norvegji, drejt disa prej porteve më të mëdha të vendit, duke mbajtur material që aktualisht transportohet me rrugë tokësore.

Pritet që anija e fuqizuar me bateri të eliminojë nevojat për 40 mijë udhëtime me kamionë në vit. Ndërsa përfitimi më i madh vjen nga eliminimi i lëshimeve në ajër të dioksidit të karbonit dhe oksideve të azotit.

Ndonëse makinat pa shofer dhe ato që vetëdrejtohen kanë marrë më shumë vëmendje vitet e fundit, përparime gjigande janë bërë tashmë në sjelljen e inteligjencës artificiale në industrinë e anijeve.

Edhe Rolls Royce po punon për t’i bërë anijet autonome realitet deri në fund të 2020-ës, në bashkëpunim me ndërtues anijesh dhe studiues nga Finlanda.

Ndërkohë edhe Bashkimi Europian ka financuar ngritjen e një agjencie që do të punojë për zhvillimin e teknologjisë së nevojshme për të prodhuar anije robotike.

Industria e transportit të mallrave në rrugë detare është duke ndjekur kështu hapin konkret të industrisë së kamionëve, që funksionojnë përmes mekanizmit të karavanit, ku një shofer në krye ndiqet nga kamionë të vetëdrejtuar.

Angelo Haruni/SCAN

*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.