Ankandet eolike finalizohen në 2023-in – Procedurat u hapën 7 muaj më parë, investitorët mund të aplikojnë deri në qershor 2022
Fituesit e ankandeve për ndërtimin e impianteve të prodhimit të energjisë nga era do të shpallen në vitin 2023. Procedurat janë hapur nga Ministria e Infrastrukturës dhe Energjisë në qershor të vitit të kaluar, por sipas programit të reformave ekonomike 2022-2024, që është nxjerrë për konsultim publik fituesi do të zgjidhet vitin që vjen, por pa dhënë afate konkrete se në çfarë periudhe të vitit.
Investitorët që janë të interesuar për ndërtimin e impianteve eolike iu është lënë 1 vit kohë për dorëzimin e ofertave të tyre, duke përcaktuar se afati i fundit do të jetë data 13 qershor 2022. Sipas të dhënave të bëra publike gjatë hapjes së ankandit, çmimi tavan do të jetë 75 euro/MW. Pjesëmarrja në këtë proces konkurrues lejohet vetëm për projekte me një kapacitet minimal prej 10 MW dhe kapacitet maksimal prej 75 MW. Ndërkohë që, nëpërmjet këtij procesi konkurrues MIE do të përzgjedhë projekte më një kapacitet të përgjithshëm prej 100 MW të cilët do të përfitojnë masat mbështetëse për blerjen e energjisë.
Megjithatë, autoriteti Kontraktues, më vonë mund të vendosë që të rrisë kapacitetin total të tenderuar deri në 150 MW. Forma e ankandit hibrid nuk është aplikuar deri më tani, ndërsa nënkupton se shteti nuk do të angazhohet me vendosjen e tokës në dispozicion të investitorëve, por do jenë këta të fundit që do të ofrojnë të gjithë paketën e investimit, duke nisur nga toka, investimi financiar e deri tek operimi.
Ola Mitre / SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.