Ankesat e biznesit, ja si mund të ngrenë shqetësimet e tyre – Qato: Jo çështje që kanë shkuar në gjykatë

Shqetësimet e biznesit tashmë nuk do të kalojnë më pa u dëgjuar. Institucioni i ministres së shtetit për mbrojtjen e sipërmarrjes ka vënë në dispozicion një mënyrë që ankesat e biznesit të arrijnë drejtpërdrejt pranë personit përgjegjës.

Gjithçka çfarë një pronar biznesi duhet të bëjë është të drejtohet tek portali i kësaj ministrie, në faqen ‘Regjistri i Ankesave’.

Këtu do të hapet një formular, i cili kërkon të dhënat e individit dhe të subjektit, si: emri, mbiemri, NIPT-i i biznesit, emri i administratorit, numri i letërnjoftimit, adresa elektronike dhe numri i telefonit.

Më pas sipërmarrësi mund të shprehet për ankesën e tij, përmes një mesazhi ose mund të ngarkojë një dokument apo foto.

Problematikat që bizneset mund të trajtojnë nuk duhet të kenë të bëjnë me çështje gjyqësore, pasi nuk janë në kompetencë të ministrisë.

E ftuar ditën e mërkurë në emisionin “Argument” nga Enio Civici, Ministrja Sonila Qato sqaroi se cila është fusha e përgjegjësisë e institucioni që drejton dhe tha se ajo do të zgjerohet me kalimin e kohës në bazë të nevojave të sipërmarrjes.

“Po t’i referohem fushës së përgjegjësisë në fuqi që ka Ministria e Shtetit për Mbrojtjen e Sipërmarrjes, ne trajtojmë të gjitha llojet e problemeve apo ankesave që kanë lidhje me zvarritjet burokratike në dyert e administratës shtetërore.

Nuk i kemi jashtë fushës së përgjegjësisë sonë çështjet, të cilat janë duke u shqyrtuar në gjykatë apo kanë një vendim gjyqësor të formës së prerë, për të cilat janë kthyer në titull ekzekutiv dhe është institucioni shtetëror përkatës, detyrimi ligjor për ta zbatuar atë vendim gjykate.

Ende nuk kemi arritur të trajtojmë, apo më saktë, nuk e kemi brenda fushës tonë të përgjegjësisë ndërmjetësimin apo trajtimin e disa çështjeve të tjera më specifike se këto.

Për momentin fusha e përgjegjësisë është kjo, por me kalimin e një kohe ku do kolaudohet edhe veprimtaria e kësaj zyre, me siguri që do t’i paraqesim qeverisë edhe nevojën për të zgjeruar fushën e aktivitetit, në varësi edhe të kapacitetit që do arrijmë të tregojmë për të ezauruar këtë lloj nevoje që ka sipërmarrja në raport me zyrën e Ministrisë së Shtetit për Mbrojtjen e Sipërmarrjes”.

A.H./SCAN

*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.