Anketa e Barometrit Europian – Ja çfarë mendojnë shqiptarët për situatën ekonomike në vend dhe Bashkimin Europian
Shumica e shqiptarëve e perceptojnë situatën ekonomike në vend si pozitive, madje shprehen pozitivisht në një pjesë më të madhe se europianët për ekonomitë e vendeve përkatëse.
Por mesa duket, shqiptarët e lidhin këtë perceptim vetëm me gjendjen personale financiare dhe situatën e punësimit, pasi shifrat janë pothuajse identike.
Nga ana tjetër, nëse 70% e europianëve shprehen të kënaqur me ekonominë familjare, vetëm 46% shprehen pozitivisht për situatën ekonomike në shtetin ku banojnë.
Të dhënat vijnë nga anketa e Eurobarometrit, një tregues i frymës europiane dhe situatës ekonomike e politike në vendet e BE, si dhe vendet kandidate.
Ndryshe nga europianët, shqiptarët janë edhe më shpresëplotë për përmirësimin e kushteve ekonomike dhe të punësimit. 55% besojnë se ekonomia e Shqipërisë do të përmirësohet 12 muajt e ardhshëm dhe ky numër ka ardhur në rritje me 11% që nga rezultatet e kaluara.
Sa i takon punësimit, edhe këtu shqiptarët shprehen optimistë, me 52% që besojnë se tregu i punës në vend do të përmirësohet dhe 49% që besojnë se dhe vetë situata e tyre e punësimit do të bëhet më mirë.
Edhe lidhur me efektet e krizës ekonomike, fryma mbetet përsëri pozitive, me ¾ e qytetarëve që shprehen se gjërat mundet vetëm të përmirësohen.
Nëse mes shqiptarëve të pyetur në këto tema mbizotëron përgjigja se gjërat do të bëhen më mirë, shtetasit europianë shprehen se gjërat do të qëndrojnë njëlloj.
Çështjet që shqetësojnë më shumë vendin tonë, sipas rezultateve të barometrit, janë sipas rëndësisë: papunësia, situata ekonomike, siguria sociale dhe shëndetësore, kostot e jetesës, krimi dhe sistemi arsimor. Ndërsa çështjet të cilat perceptohen si më pak problematike janë: terrorizmi, taksat, strehimi, pensionet, borxhi qeveritar dhe çështjet e mjedisit dhe energjisë.
Individualisht, ajo që prek më shumë çdo shqiptar është rritja e kostos së jetesës, siguria shëndetësore dhe sociale, si edhe papunësia.
Besimi tek Bashkimi Europian në rastin tonë është shumë më i lartë se tek institucionet në vend si qeveria dhe parlamenti. Në vendet e tjera këto shifra paraqiten të përmbysura.
Shqiptarët shprehen më të lidhur pas qytetit ku jetojnë se ndaj Shtetit apo Bashkimit Europian, megjithëse 73% e të pyeturve shprehen se integrimi në këtë union u ofron një imazh pozitiv.
Sipas anketës, për ne, BE nënkupton për ne diçka moderne, demokratike dhe largpamëse.
Angelo Haruni/SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.