Anketa e ndërmarrjeve/ Kontributin më të madh në ekonominë shqiptare e japin ato me mbi 50 punonjës, edhe pse janë vetëm 1.2 %
Gjatë vitit 2018, nga vrojtimi i realizuar nga INSTAT rezulton se ndërmarrjet me 50 e më shumë të punësuar japin kontributin kryesorë në ekonomi. Ato kanë realizuar 48,5 % të shitjeve neto, kanë 42,2 % të të punësuarve gjithsej dhe 60,5 % të investimeve edhe pse përbëjnë vetëm 1,2 % të ndërmarrjeve aktive.
Nga rezultatet paraprake të Anketës Strukturore të Ndërmarrjeve vërehet se ndërmarrjet me 50 e më shumë të punësuar kanë kontributin më të madh të shitjeve neto me +5,0 pikë përqindje, të ndjekura nga ndërmarrjet me 10-49 të punësuar me +2,4 pikë përqindje në ndryshimin vjetor gjithsej të shitjeve neto.
Në prodhuesit e të mirave, numri i ndërmarrje ka pësuar rënie me 1,0 %, krahasuar me vitin 2017, numri i të punësuarve është rritur me 4,3 %, shitjet neto janë rritur me 8,6 %, ndërsa investimet janë ulur me 7,6 %.
“Gjatë vitit 2018, ndërmarrjet me 50 e më shumë të punësuar zunë 5,3 % të ndërmarrjeve prodhuese të të mirave dhe realizuan 67,1 % të shitjeve neto. Numri i të punësuarve në këtë grup zuri 64,0 % të të punësuarve në prodhuesit e të mirave, ndërsa investimet arritën vlerën 108 miliardë lekë dhe përbëjnë 72,9 % të investimeve të prodhuesve të të mirave.
Gjatë vitit 2018, ndërmarrjet në grupin me 1-4 të punësuar përfaqësuan 69,3 % të ndërmarrjeve dhe punësuan 9,7 % të të punësuarve, të prodhuesve të të mirave. Ky grup ndërmarrjesh realizoi 4,5 % të shitjeve neto dhe 3,0 % të investimeve për prodhuesit e të mirave” shkruhet në raportin e INSTAT.
Në prodhuesit e shërbimeve, numri i ndërmarrjeve ka pësuar rënie me 0,1 %, krahasuar me vitin 2017, ndërsa treguesit e tjerë kanë shënuar rritje të numrit të të punësuarve me 4,8 %, shitjet neto me 6,1 % dhe investimet me 26,1 %.
Gjatë vitit 2018, ndërmarrjet me 50 e më shumë të punësuar përbëjnë 0,6 % të ndërmarrjeve aktive në prodhuesit e shërbimeve dhe realizuan 39,0 % të shitjeve neto. Në këtë grup investimet arritën vlerën 36 miliardë lekë dhe përbënë 40,2 % të investimeve.
Ndërmarrjet në grupin me 1-4 të punësuar përfaqësuan 90,1 % të ndërmarrjeve aktive, punësuan 40,5 % të të punësuarve të prodhuesve të shërbimeve dhe arritën vlerën prej 21 miliardë lekë investime, duke përbërë 23,3 % të investimeve të realizuara nga prodhuesit e shërbimeve.
SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.