Anketa e PWC: CEO-t shqiptarë optimistë për rritjen!
Të enjten kompania e mirënjohur ndërkombëtare në fushën e auditimit, taksave dhe konsulencës financiare, “PricewaterhouseCoopers Albania”, prezantoi gjetjet e anketimit me drejtuesit e kompanive më të rëndësishme shqiptare.
Përgjithësisht, bizneset në Shqipëri kanë pritshmëri të larta, për sa i takon rritjes ekonomike në terma afatshkurtër dhe afatmesëm. Rezultatet treguan se, ndërsa trendi ndërkombëtar i zhvillimit fokusohet te shitja apo blerja e kompanive konkurruese, drejtuesit në Shqipëri janë më të prirur drejt rritjes organike bazuar në përmirësimin e produkteve si edhe përmirësimit të pozicionit në treg si edhe uljes të kostove.
Drejtuesit e biznesit në Shqipëri janë të të njëjtit mendim me ata ndërkombëtarë në lidhje me objektivin e rritjes së numrit të fuqisë punëtore, pavarësisht zhvillimeve teknologjike apo automatizimit të shumë proceseve.
Prej më shumë se 20 vitesh “PricewaterhouseCoopers” zhvillon një anketim në nivel global me liderët e kompanive, ku ata japin opinionin e tyre në lidhje me klimën e biznesit, arritjet e vitit dhe sfidat operacionale në nivel afatin e mesëm dhe të shkurtër.
Këtë vit për herë të parë ky anketim përfshiu dhe drejtuesit e kompanive në Shqipëri, të cilët patën mundësinë të ndanin opinionin e tyre mbi klimën, besimin, sfidat e biznesit, mjedisin ekonomik, politik dhe social, sfidat për gjetjen dhe mbajtjen e talenteve, zhvillimi në një mjedis konkurrues si dhe përshtatja në një treg gjithnjë e me shume te orientuar drejt teknologjisë se dixhitalizuar.
Ersuin Shehu/SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.