“Anti-informaliteti 3”, Ahmetaj letër sipërmarrjes: “Të mbetemi këmbëngulës në zbatim të ligjit”. Mirëpret rekomandime konkrete nga biznesi

Ministri i Financave dhe i Ekonomisë i ka dërguar një letër sipërmarrësve, në kuadër të aksionit kundër informalitetit. Konkretisht, përmes kësaj letre, ministri Ahmetaj ka kërkuar bashkëpunimin e sipërmarrjes për fazën e tretë të “anti-informalitetit”.

Më tej në këtë letër, kreu i Financave publike shprehet se biznesi dhe dikasteri që ai drejton mbeten në të njëjtën anë, ku ka apeluar që të dy palët të mbeten këmbëngulës në zbatim të ligjit.

“Në këtë betejë ne e sipërmarrja jemi në të njëjtën anë. Do të mbetemi këmbëngulës në zbatim të ligjit”, tha Ahmetaj.

Gjatë kësaj letre, ministri i Financave flet edhe reformë kyçe për sipërmarrjen, si dhe ka ftuar përfaqësuesit e bizneseve të ofrojnë rekomandime konkrete.

Në këtë letër ai nuk la jashtë vëmendjes punësimin dhe sigurinë në punë, por edhe nismat që do të ndërmerren për të shmangur dokumentet e shumta në marrjen e shërbimeve publike.

“Mirëpresim çdo ide apo rekomandim konkreti. Sa i takon de-rregullimit të tregut do të ketë reformë kyçe për sipërmarrjen. Do të kemi në vëmendje punësimin dhe sigurinë në punë. Njëkohësisht për marrjen e një shërbimi do të reduktohen shumë dokumente” shprehet Ahmetaj në letrën e tij drejtuar sipërmarrjes.

Kreu i Financave u shpreh pak ditë më parë se faza e tretë e anti- informalitetit nis më 1 tetor dhe do të ketë një koordinim mes institucionit të Tatimeve, Doganave dhe Inspektoriatit të Punës.

Kështu, informaliteti në ekonominë shqiptare llogaritet të jetë rreth 40 për qind, për këtë arsye qeveria “Rama 1” ndërmori një aksion ndaj këtij fenomeni, ku faza e parë u fokusua në lëshimin e kuponit tatimor, faza e dytë te formalizimi i bizneseve, ndërsa faza e tretë që tashmë duket se e ka ngritur “siparin” do të nisë me kontrollin e bizneseve të madha.

Osman Dedja/SCAN

Letra drejtuar sipërmarrësve

“Të nderuar, Ministria e Financave dhe Ekonomisë do të prezantojë së shpejti planin e detajuar të aksionit për vazhdimin e betejës kundër informalitetit në ekonomi, si një nga prioritetet tona kryesore përgjatë mandatit të parë dhe që do të vijojë të mbetet i tillë edhe në katërvjeçarin e ardhshëm.

Ne mbetemi këmbëngulës në zbatueshmërinë e ligjit, për garantimin e rregullave të drejta e të barabarta në një treg të hapur e konkurrues, por në të njëjtën kohë, tejet mbështetës e bashkëpunues me biznesin sepse në këtë betejë, ne dhe sipërmarrja qëndrojmë në të njëjtën anë.

Tashmë kemi një eksperiencë të suksesshme nga viti i kaluar, me hartimin e paketës së thjeshtuar të mbi 42 procedurave tatimore e doganore, krahas një sërë lehtësish të tjera të prezantuara në funksion të përmirësimit të klimës së biznesit. Angazhimi ynë në këtë drejtim, vijon edhe me një tjetër reformë thelbësore në favor të sipërmarrjes, dhe rregullimin e tregut përmes reduktimit të numrit të lejeve/licencave dhe autorizimeve si dhe dokumenteve që kërkohen nga zyrat e shtetit për përfitimin e një shërbimi apo të drejte.

Qasja jonë për betejën pa kushte dhe me zero tolerancë kundër informalitetit, ka hyrë në një stad të ri, në përgjigje të të cilit do të duhet të kalojmë edhe në një fazë të re të përgjegjësisë tatimore, bazuar tek rritja e pajtueshmërisë ndaj zbatimit të ligjit, vetëkorrigjimi, vullnetarizmi dhe transparenca.

Strukturat në varësi të Ministrisë së Financave dhe Ekonomisë, Drejtoria e Përgjithshme e Tatimeve, Drejtoria e Përgjithshme e Doganave dhe Inspektorati i Punës do të organizohen në grupe të përbashkëta, të orientuara nga analiza e profileve të riskut të sektorëve dhe bizneseve brenda tyre duke pasur në fokus të gjithë zinxhirin e transaksioneve nga biznesi i madh deri tek konsumatori final. Punësimi e siguria në punë, do të kenë një vëmendje të posaçme brenda aksionit.

Me bindjen që informaliteti është një sfidë që e ndajmë së bashku, unë ju ftoj ta përmirësojmë eksperiencën tonë të deritanishme për të ndërtuar një realitet të ri të zbatimit të ligjit. Çdo sugjerim, ide, rekomandim konkret i juaji në këtë drejtim, është më se i mirëpritur për ta ndarë në një tryezë të përbashkët diskutimi në ditët në vijim.”

*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.