“Anti-informaliteti” shkon te AirBNB  dhe Booking! Tatimet: Shqiptarët që kanë listuar dhoma duhet të paguajnë tatime dhe sigurime

Ata që kanë listuar në AirBNB dhe Booking, struktura akomoduese do të duhet që të paguajnë krahas taksave edhe kontributet shoqërore dhe shëndetësore, ashtu si çdo biznes tjetër. Drejtoria e Përgjithshme e Tatimeve njofton se ka në monitorim subjektet që kanë listuar informacione në këto faqe dhe ushtrojnë aktivitet ekonomik.

Synimi është që të identifikohen individët që ushtrojnë aktivitet ekonomik në këto faqe por që nuk janë regjistruar në Qendrën Kombëtare të Biznesit.

“Çdo person që ofron shërbimin e akomodimit (hotelerisë), brenda territorit të Republikës së Shqipërisë, kryen një veprimtari ekonomike për të cilën është i detyruar të regjistrohet pranë Qendrës Kombëtare të Biznesit.  Çdo aktivitet ekonomik i ushtruar në mënyrë të paligjshme, apo e ardhur e padeklaruar e siguruar nga ky aktivitet, konsiderohet shkelje dhe penalizohet në bazë të dispozitave të ligjit procedurial.

Në mbështetje të Nenit 41, pika 2 e Ligjit Nr. 9920, datë 19.05.2008 “Për Procedurat Tatimore në Republikën e Shqipërisë” i ndryshuar, bëhet bllokimi i së drejtës për të ushtruar aktivitetin ekonomik e pezullimi i lejes/licencës për ushtrim veprimtarie për një periudhë gjashtëmujore (për ato subjekte që e disponojnë një të tillë sipas ligjit të turizmit) si dhe vendoset penalitet sipas Nenit 112 të po këtij ligji” njofton Tatimet.

Në AirBNB janë të regjistruar nga Shqipëria 2897 struktura akomoduese, ndërsa në Booking 2784 të tilla.

SCAN

Tatimi për dhomat në Booking dhe AirBNB – Sa para qarkullojnë, sa individë prek, si do të taksohen

*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.