Anulimi i kamatëvonesave – Basha: Asnjë qytetar nuk do të paguajë më për aferën e CEZ

Partia Demokratike ka hapur fushatën e saj zgjedhore edhe në Tiranë. Lulzim Basha ka zhvilluar një takim me banorët e njësive 4 dhe 8, ku ka shpalosur programin e tij elektoral.

Basha ka rikujtuar edhe një herë se do të jetë kryeministër i ekonomisë për të bërë ndryshim rrënjësor të vendit. Premtimi i radhës i partisë demokratike është anulimi i kamatëvonesës që paguajnë qytetarët për energjinë elektrike.

Basha ka vijuar më tej duke ripërsëritur premtimet për uljen e taksave, hapjen e vendeve të reja të punës, rritjen e pensionit si dhe gjallërimin e ekonomisë së vendit.

“Vendimi im i parë do të jetë ulja e taksave dhe çlirimi i qindra milionë eurove në ekonominë shqiptare. 10 mijë të rinj shqiptarë do të kenë stazhe të paguara nga Republika e Re me rrogë 200 mijë lekë të muaj për të bërë urën nga bankat e universitetit, tek tregu i punës. Do të luftojmë fuqishëm që sipërmarrja e madhe të hapë fabrika e të hapë vende pune. Mbështetje direkte financiare për ata që hapin vende pune. Do të konkurrojmë në rajon e kudo. Lufta ime e përnatshme dhe e përditshme do të jetë për të hapur vende pune. E nesërmja e sigurt do të fillojmë me fëmijët e shqiptarëve. Investimi më i madh i Republikës së Re do të jenë shkollat publike ku, nga kopshti deri në mature, shkollat do të përgatiten me infrastrukturë, me mësues, me kuzhina për drekën falas për çdo fëmijë shqiptar. E nesërme e sigurt do të thotë ndihmë ekonomike për të gjitha familjet në nevojë ekonomike dhe do të thotë pagesa e faturës së energjisë dhe të ujit si shtesë dhe jo t’ia japësh me një dorë dhe me tjetrën t’ia zhdukësh me faturat e larta”, tha Basha.

Entela Barjamaj/SCAN

*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.