Anulohen mbi 4,500 fluturime për Krishtlindje – Rritja e rasteve me Covid nxiti pasiguri tek udhëtuesit gjatë fundjavës
Linjat ajrore tregtare në të gjithë botën kanë anuluar mbi 4,500 fluturime gjatë fundjavës së Krishtlindjeve, ndërkohë që rritja e infeksioneve me Covid-19, të nxitura nga varianti Omicron, krijuan një pasiguri më të madhe për udhëtuesit gjatë pushimeve. Linjat ajrore në nivel botëror anuluan 2,401 fluturime vetëm ditën e Premte, gjatë Mbrëmjes së Krishtlindjeve, që është një ditë zakonisht e zënë për trafikun ajror, sipas faqes që ndjek fluturimet “FlightAware.com”.
Thuajse 10,000 fluturime të tjera u vonuan. Faqja tregoi se 1,770 fluturime gjatë ditës së Krishtlindjeve u anuluan, ndjekur nga 402 të tjera ditën e Diel. Trafiku ajror brenda SHBA dhe drejt apo jashtë vendit, zinte thuajse 25% të të gjithë fluturimeve të anuluara gjatë fundjavës, sipas FlightAware.
Ndër linjat e para amerikane që raportuan valën e anulimeve ishin United Airlines dhe Delta Airlines, që ndaluan rreth 280 fluturimeve vetëm për ditën e Premte, për shkak të mungesës së stafit në një kohë të rritjes së infeksioneve. Rastet në SHBA janë rritur në ditët e fundit për shkak të variantit tejet të transhmetueshëm Oimcron, që u zbulua për herë të parë në fund të Nëntorit dhe zë tashmë mbi 75% të rasteve në vend.
Klevis Llaha / SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.