Apeli lë në fuqi dënimin me 2 vjet për Adriatik Llallën – I sekuestrohen 5 prona, ish-Kryeprokurori jashtë shtetit për arsye shëndetësore
Apeli I Gjykatës së Posaçme kundër Krimit e Korrupsionit ka lënë në fuqi vendimin e shkallës së parë që e dënoi me dy vite burg dhe sekuestrim të pasurive ish Prokurorin e Përgjithshëm Adriatik Llalla. Vendimi është marrë në mungesë të Llallës, i cili është përfaqësuar nga avokati Sokol Hazizaj, me justifikimin se ish Kryeprokurori gjendet jashtë shtetit për shkak të një sëmundjeje të rëndë. Mësohet se prej rreth një jave Llalla është larguar jashtë Shqipërisë për motive shëndetësore. Avokati I tij Sokol Hazizaj ka bërë me dije se nuk e di vendndodhjen e Llallës, ndërkohë që mosdorëzimi pranë autoriteteve brenda afateve ligjore do ta kthente ish Kryeprokurorin në person në kërkim nga drejtësia. Ai sqaroi se do të bëjnë recurs ndaj vendimit të Apelit.
Gjykata e posaçme la kështu në fuqi vendimin e shkallës së parë, për dy vjet heqje lirie të Llallës, njëherësh duke vendosur edhe sekuestrimin e 5 pasurive të paluajtshme në zotërim të tij. Bëhet fjalë për katër sipërfaqe tokë arë, në zona mjaft të shtrenjta në afërsi të Tiranës, si dhe një apartamenti në Durrës.
Llalla u çua në gjykatë nga SPAK, nën akzuat “Refuzimi për deklarimin, mosdeklarimi, fshehja ose deklarimi i rremë i pasurive, interesave private të personave të zgjedhur dhe nëpunësve publikë ose i çdo personi tjetër që ka detyrimin ligjor për deklarim”, të kryer tre herë, të parashikuar nga neni 257/a, paragrafi (2) i Kodit Penal.
Lorenc Rabeta / SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.