‘Apokalips’ në restorante – 240 miliardë dollarë humbje në fitime dhe miliona punonjës të mbetur pa punë
Industria e restoranteve po kërkon ndërhyrje të mëtejshme të qeverisë, pasi ka frikë nga një apokalips i mbylljeve në masë.
Tetë milion punonjës të industrisë së restoranteve tashmë janë pushuar ose pezulluar nga puna, sipas një studimi të Shoqatës Kombëtare të Restoranteve (NRA). Kjo do të thotë se dy nga tre punëtorët e restoranteve në të gjithë SHBA janë pa punë.
Sondazhi i NRA për më shumë se 6.500 operatorë restorantesh në të gjithë SHBA zbuloi se industria e restoranteve dhe shërbimeve ushqimore humbi 30 miliardë dollarë të ardhura në mars dhe pret që të humbasë 50 miliardë dollarë shtesë në prill. Deri në fund të vitit 2020, restorantet pritet të shohin humbje prej 240 miliardë dollarësh.
NRA po kërkon krijimin e një fondi të rimëkëmbjes prej 240 miliardë dollarësh, i përqendruar vetëm për industrinë e restoranteve.
Sipas NRA, afërsisht 3% e restoranteve në SHBA – ose 30,000 restorante – tashmë janë mbyllur. Në sondazhin e hershëm të prillit, 5% më shumë thanë se ata parashikuan mbylljen në 30 ditët e ardhshme, që do të thotë se më shumë se 50,000 restorante mund të mbyllen përgjithmonë.
D.B – SCAN
Burimi: Business Insider
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.