Apple rrit prodhimin – Kërkesë më e lartë se pritshmëritë për iPhone 11
Apple i ka kërkuar furnitorëve të saj që të rrisin prodhimin e iPhone 11, me 8 milionë njësi, ose rreth 10% më shumë, raporton Nikkei. Arsyeja kryesore e kërkesës për të rritur prodhimin e aparatit celular inteligjentë duket se ka të bëjë me një kërkesë mbi pritshmëritë për serinë më të re të modeleve iPhone.
Përpara se të dilte në treg linja e re, kompania u tregua konservatore me shifrat e porosive, duke pasur parasysh rezultatin e linjës së vitit të kaluar. Burime të ndryshme thonë për Nikkei se kërkesa është e lartë, sidomos për modelin e lirë dhe për atë Pro, ndërkohë që për iPhone Pro max, Apple ka kërkuar një ulje të prodhimit. Pro Max është modeli kryesor dhe ai që ka çmimin më të lartë. Të njëjtat burime thonë se furnitorët janë të shqetësuar se rritja e prodhimit nuk do të përballohet dot nga ta.
Apple ndërkohë nuk ka bërë ende asnjë koment në lidhje me këtë. Kompania prezantoi në Shtator modelet e reja të iPhone, me një çmim më të ulët se viti i kaluar, me çmimin më të ulët për modelin më të lirë, në 699 dollarë, nga 749 të vitit të kaluar.
SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.