Arbitrazhet do të bëhen në Shqipëri – Projektligji, si do të përcaktohen arbitrat dhe trupat që do zgjidhin konfliktet ekonomike
Mosmarrëveshjet me karakter ekonomik tashmë do të zgjidhen nga arbitrazhet shqiptare, pa qenë nevoja për t’ju drejtuar gjykatave ndërkombëtare të kësaj natyre. Ministria e Drejtësisë ka nxjerrë për konsultim publik Projektligjin për Arbitrazhin në Republikën e Shqipërisë që përcakton llojet e përplasjeve që do zgjidhen përmes tij, Gjykatat shqiptare përgjegjës, mënyrën si do zgjidhen arbitrat e format e ankimimit të vendimeve nga palët.
Personat fizikë dhe juridikë që kanë selinë e tyre në Republikën e Shqipërisë mund të bien dakord të paraqesin mosmarrëveshjet e tyre në një arbitrazh të huaj, përveç rasteve kur mosmarrëveshja i nënshtrohet juridiksionit ekskluziv të një gjykate të Republikës së Shqipërisë.
Në relacionin shoqërues të draftit theksohet se arbitrazhi është një proces më fleksibël krahasuar me një proces gjyqësor duke qenë se nuk është pjesë e sistemit shtetëror të gjykatave. Nga ana tjetër, edhe pse arbitrazhi mbështetet në një procedurë konsensuale mbështetur në marrëveshjen e lidhur midis palëve, por funksioni që realizon është i njëjtë me atë sistemit të gjykatave. Në përfundim të procesit konkludohet me vendim nga gjykata arbitrazhi i cili është titull ekzekutiv.
Sipas draftit, palët janë të lira të përcaktojnë numrin e arbitrave. Në mungesë të këtij përcaktimi numri i arbitrave duhet të jetë tre. Në një procedurë arbitrazhi me tre arbitra, secila palë emëron një arbitër dhe dy arbitrat e emëruar nga palët emërojnë arbitrin e tretë. Nëse njëra palë nuk e emëron arbitrin brenda 30 (tridhjetë) ditëve nga marrja e kërkesës për të emëruar arbitrin, ose nëse dy arbitrat nuk arrijnë të bien dakord për emërimin e arbitrit të tretë brenda 30 (tridhjetë) ditëve nga emërimi i tyre, me kërkesën e palëve arbitri përkatës emërohet nga Gjykata.
Do të jetë Gjykata e Tiranës ajo që do të mbikëqyrë Gjykatat e Arbitrazhit ndërsa vendimet e tyre do mund të ankohen në Gjykatën e Apelit po në kryeqytet.
SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.