Arbitrazhi për HEC-in e Kalivaçit-Shqipëria fiton çështjen, kompania kërkonte 137 mln euro
Shqipëria ka fituar përballjen në arbitrazh ndaj shoqërisë Hydro S.R.L., e cila kërkonte një dëmshpërblim prej 137 milion euro për prishjen e kontratës koncesionare për ndërtimin e hidorcentralit të Kalivaçit. Kompania, në pronësi të biznesmenit italian Francesco Becchetti paditi në tetot 2014 Ministrinë e Transportit dhe atë të Ekonomisë, në Arbitrazhin Ndërkombëtar të Dhomës Ndërkombëtare të Tregtisë, duke kërkuar zgjidhje të marrëveshjes së koncesionit të lidhur midis palëve ndërgjyqëse për ndërtimin e hidrocentralit mbi lumin Vjosë.
Ndërkohë që, qeveria shqiptare paraqiti kundërpadi në këtë proces ku pretendoi se, Paditësi ka qenë në shkelje dhe mospërmbushje të kontratës së koncesionit, për fajin e tij, duke i shkaktuar në këtë mënyrë një dëm prej €158 milion euro.
Krahas pagesës së këtij dëmi, Shqipëria kërkoi edhe pagesën e kamat-vonesave për mospërmbushjen e kontratës deri në vlerën prej €12.9 milion euro.
Trupa e gjykimit vendosi që të rrëzojë të gjithë pretendimet e Paditësit, duke e ngarkuar këtë të fundit me faj për mospërmbushjen e Kontratës dhe me pagesën e kamat-vonesave deri në vlerën e cituar më lart dhe të të gjithë kostove ligjore dhe të procesit të arbitrazhit të pësuara nga i Padituri, në një vlerë prej rreth €1,2 milion euro.
Ndërkohë që, në një vendim të dytë, Trupa e gjykimit do të vendosë vlerën e dëmshpërblimit që Paditësi do të duhet t’i paguajë Shqipërisë për mospërmbushjen e kontratës së koncesionit për faj të tij, bashkë me të gjithë interesat dhe kostot e tjera të zbatueshme.
Ola Mitre/SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.