“Argument” – Kthimi i Buxhetit, Panariti: “Harxhohen para për koncesione dhe neglizhohen sektorët jetikë të ekonomisë”

I ftuar në emisionin “Argument” me gazetarin Enio Civici ka qenë këshilltari i kabinetit Presidentit të Republikës, Edmond Panariti.

Tema e mbrëmjes së sotme është zhvilluar rreth rikthimit ligjit per Buxhetin e Shtetit nga ana e Presidentit, Ilir Meta, i cili në një material të gjatë dhe shterues shpjegonte arsyet pse ligji ka nevojë për rishikim dhe se nuk merr parasysh disa nga problemet kryesore me të cilat do të përballet ekonomia e Shqipërisë në vitin e ardhshëm.

Z.Panariti shpjegoi në mënyrë kryesore dhe të përmbledhura arsyet kryesore pse Presidenti e ktheu sërish ligjin në Komisione për diskutim.

“Bëhet fjalë për një material shterues të plotë dhe të argumentuar pse Presidenti e konsideron të arsyeshëm kthimin që i bëri ligjit për Buxhetin për rishikim.

Arsyeja e parë është se situata e pandemisë që është në zhvillim dhe përshkallëzim dhe këtë e thonë parashikimet e institucioneve që thonë se do kemi rritje të rasteve deri nga fundi i prillit pavarësisht futjes së vaksinës.

Do kemi një rritje të rasteve të infektuarve dhe për fat të keq edhe të rasteve të rënda. Kjo kërkon adresim nga ana e Buxhetit dhe ne nuk kemi parë alokim të mjaftueshëm për shëndetësinë në veçanti dhe situatën e pandemisë në përgjithësi. Kemi një mosreagim nga zëri buxhetor përkatës. Kshu që nevojitet shumëfishim, pasi do kemi nevojë për shtretër spitalore, ilaçe dhe të tjera paisje të nevojshme në të ardhmen.

Arsyeja e dytë është se nuk merren parasysh parashikimet e FMN dhe BB për të pezulluar partneritetin publik-privat sidomos për kontratat e pakërkuara. Nga kërkesat e mekanizmave ndërkombëtare, sasitë e parave që tërheqin këto kontrata koncesionare, si dhe pagesat e parashikuara shkojnë deri ne 49% të PBB dhe është kërkuar që këto pagesa të pezulloheshin që këto lekë të shkojnë për sektorë prioritarë. Alokohen jo pak por 233 miliardë lekë. Shtohen me 22% pagesat drejt partneriteteve publik-privat me kontrata të pakërkuara.

Në shtetin fqinj Maqedonia e Veriut paketa totale mbështetjes së ekonomisë ka shkuar në 1 mld euro, pasi kanë rialokuar fonde të reja në paketën e katërt të situatës së emergjencës.

Kemi mungesë totale të mbështetjes fianciare për biznesin e vogël. Kjo ka qenë një arsye tjetër pse presidenti e ka kthyer edhe njëherë ligjin në parlament. Biznesi ndodhet përpara një situate të jashtëzakonshme pasi kufizimet kanë penalizuar rëndë bizneset e vogla, por edhe të përballur nga mungesa e qarkullimit të mallit, nga lëvizja dhe kërkesa e konsumatorëve kanë çuar në prag falimenti një pjesë të madhe të tyre.

Duhet pra që qeveria të pompojë para në sektorë jetikë si Shëndetësia dhe mbështetja e biznesit dhe shihet qartë se Buxheti nuk i reflekton këto kërkesa në mënyrë të rëndësishme.”

SCAN

*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.