“Argument” – Ministrja Denaj publikon shifrat zyrtare të papunësisë nga pandemia: “Shumica prej tyre të mbuluar me ndihmën shtetërore”

E ftuar në “Argument” me gazetarin Enio Civici mbrëmjen e sotme ishte ministrja e Financave dhe Ekonomisë, Anila Denaj.

Ministrja ka treguar me statistika zyrtare ndikimin që pati në papunësi kriza e COVID-19 si dhe numrin e bizneseve që janë detyruar të mbyllin aktivitetin.

Sipas, saj numri është përtej parashikimeve pesimiste të qeverisë dhe mjaft sipërmarrës e kanë vlerësuar situatën si të përkohshme, duke mbajtur gjallë frymën e optimizmit:

“Në muajin prill kemi 38 mijë të larguar nga puna, gjë që ishte e pritshme nga  administrata tatimore. Ky ishte muaji ku bizneset u ballafaquan edhe më fort me situatën e mbylljes apo xhiros së reduktuar.

Kemi konstatuar që ka shumë biznese që kanë adresuar nevojat për likuiditet, në mënyrë që  të mos largojnë punonjësit. Kësaj i ka shërbyer garancia sovrane e parë. Gjithashtu kemi edhe garancinë e dytë sovrane që ka ndihmuar me qarkullimin dhe aktivet e bizneseve.

Në total për të gjithë periudhën e pandemisë të larguarit nga puna janë diku tek 80 mijë persona, ku një pjesë e kosniderueshme e tyre kanë marrë ndihmën financiare të qeverisë.

Ndërkohë, numri i mbylljes së bizneseve është shumë i reduktuar. Bizneset e kanë parë si situatë të përkohshme. Me shifra kemi rreth 800 prej tyre kanë kërkuar pezullim, por që prej nesh pritej një numër më i madh.”

G.K / SCAN

*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.