“Argument” – Nikolin Jaka: “Paketë e re për bizneset që të shmanget vdekja klinike e ekonomisë”
I ftuar në “Argument” në mbrëmjen e sotme ishte Nikolin Jaka, Kryetar i Dhomës së Tregtisë dhe Industrisë, Tiranë.
Tema është fokusuar mbi pikat e e paraqitura nga biznesi drejt qeverisë, për një paketë ekonomike dhe stimuluese mbi kërkesat që të gjithë sektorët kanë bërë, në kushtet kur shumica e tyre janë të mbyllura me urdhër qeverie. Qeveria ka paraqitur një paketë që e ka quajtur Plani A, por kjo nuk është e pamjaftueshme sipas bizneseve.
Sipas z.Jaka rreth 50% e ekonomisë shqiptare në kushtet e sotme nuk prodhon më vlera duke ndikaur kështu në paralizimin e Buxhetit të Shtetit:
“Në informacionin tonë, shumica e setkorëve janë të pezulluar në mënyrë absolute. Janë sektorë që kanë performance dhe punësojnë shumë njerëz. Kemi të mbyllur turizmin, Horekën, sektorin e transportit të udhëtarëve nga urbanë, në ndërurbanë. Kemi të mbyllur të gjitha bizneset e vogla, të cilat janë në sektorë të ndryshëm. Në një përllogaritje të përafërt gjysma e sipërmarrjeve është në mbyllje të plotë. Të ardhurat e Shtetit nga 12 milionë do shkojnë në 6 milionë euro në ditë. Prandaj qeveria së bashku me bizneset duhet të ndërmarrin nismat për të krijojë një paketë që të rikuperojë performimin e sipërmarrjes private nesër pas COVID-19. ”
“Ne si sipërmarrje dhe Dhomat e Tregtisë së Tiranës dhe Durrësit, në kushtet e emergjencës i kemi drejtuar një kërkesë qeverisë shqiptare dhe të shikojmë për një Plan B që të mos kemi pasojat e një vdekje klinike të ekonomisë. Qeveria shqiptare reagoi dhe u mirëprit, por ne dolëm në konkluzionet që kjo paketë emergjente është e pamjaftueshme për të përballuar kërkesat e sipërmarrjes nesër.”
“Kjo nuk është situatë lufte, por një situatë e panjohur për shoqërinë. Një situatë ku nuk kishte të njëjtin skenar as në vitet 1918’-19 në gripin spanjoll, por ka paralizuar ekonominë botërore. Sot GDP-ja Botërore qarkullon 60-70% vetëm shërbime dhe këto janë të bllokuara. Pra, duhet të jemi të ndërgjegjshëm për të kuptuar situatën ku jemi. ”
“Në pikat që ne kemi përpiluar janë kërkesat më bazike që mund t’i kërkohen një qeverie, e cila ka mbyllur disa sektorë të ekonomisë, që të kompensojë pagat e punonjësve dhe të pezullojë detyrimet fiskale.”
G.K / SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.