Ari publikon fitime modeste javore – Mbështetet nga përhapja e variantit Delta dhe nga Rezerva Federale
Ari po qëndron në rritje në sesionin e sotëm dhe pritet të publikojë fitime për të dytën javë me radhë. Metali i çmuar vijon të mbështetet nga pasiguritë që kanë të bëjnë me rritjen e infektimeve me variantin Delta të koronavirusit, që ka detyruar investitorët të preferojnë asetet me risk.
Ari po tregtohet në rreth 1,785 dollarë për onz, ndërsa përgjatë gjithë javës është në rritje të lehtë me 0.5%. Analistët shprehen se pesimizmi mbi rritjen ekonomike në terma afatmesëm po mbështet çmimet e arit.
Gjithashtu, edhe dollari amerikan, që cilësohet si një aset i sigurtë është ngjitur në nivelin më të lartë në 9 muajt e fundit, i mbështetur nga shqetësimet mbi koronavirusin dhe nga pritshmëritë se Rezerva Federale do të fillojë zvogëlimin e stimujve, gjatë këtij viti.
Tregjet po pozicionohen mbi parashikimin e Rezervës Federale se shtrëngimi i politikës monetare po bëhet i pashmangshëm dhe një njoftim zyrtar mund të bëhet gjatë muajit shtator. Ari vlerësohet si një aset i sigurtë ndaj luhatjeve të inflacionit dhe të monedhave.
Klevis Llaha/ SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.