Arka e shtetit “humbet” 223 milionë euro – COVID-19 godet rëndë të ardhurat, nuk “shpëtojnë” vendorët
Në 5 muajt e parë të vitit buxheti i shtetit ka mbledhur 160.7 miliardë lekë, duke bërë që të ardhurat të kenë një rënie drastike krahasimisht me të njëjtën periudhë të 2019-ës, me afro 27.7 miliardë lekë apo 222.6 milionë euro. Po ashtu në raport me planin për periudhën, buxhetit i mungojnë afro 12 miliardë lekë apo 96.4 milionë euro. Duket se pasojat e masave të marra kundër COVID-19 kanë vijuar të shtrihen edhe në muajin Maj, duke bërë që arka e shtetit të jetë në përudhën e saj më të vështirë sa i takon mbledhjes së të ardhurave.
Të ardhurat nga tatimet dhe doganat janë zëri më problematik, pasi rezultojnë të jenë mbledhur 103.3 miliardë lekë apo 21.4 miliardë më pak se një vit më parë dhe me diferencë te theksuar nga parashikimet, me 9.5 miliardë lekë. Të gjithë treguesit nga ky zë rezultojnë më rënie, si TVSH-ja që është tregues direkt i konsumit, ku rezultojnë të jenë mbledhur 7 miliardë lekë më pak se 5-mujori i 2019-ës, Tatimi mbi fitimin me 6.3 miliardë lekë më pak, akcizat 1.2 miliardë lekë minus, tatimi mbi të ardhurat personale 4.9 miliardë lekë më pak dhe taksat nacionale dhe doganore që paraqiten me një rënie të lehtë.
Me një rënie prej 4.4 miliardë lekësh paraqiten edhe të ardhurat nga pushteti vendor, në raport me 2019, ku janë mbledhur në total afro 7 miliardë lekë apo 38.4 për qind më pak.
Elisabeta Dosku / SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.