Arka mbushet me 865 mln euro – TVSH vijon të japë kontribut negativ
Në 3 muajt e parë të vitit financat shtetërore kanë ardhur në përmirësim të dukshëm, ndërsa janë mbledhur në total rreth 108 miliardë lekë, apo 865 milionë euro. Referuar treguesve fiskale të publikuar nga Ministria e Financave, në krahasim me të njëjtën periudhë të një viti më parë për muajin Mars rezulton të jenë arkëtuar 2.6 miliardë lekë më shumë, pasi në Mars të 2018-ës u mblodhën 105.4 miliardë lekë.
Performancë pozitive ka pasur mbledhja e tatimit mbi fitimin në rreth 11.6 miliardë lekë nga 9.7 miliardë që janë mbledhur vitin e kaluar, tatimi mbi të ardhurat personale, ku janë mbledhur 9.4 miliardë lekë nga 8.5 miliardë lekë që u mblodhën në Mars 2018.
Ndërsa Tatimi mbi Vlerën e Shtuar ka vijuar të kontribuojë negativisht në performancën e të ardhurave, pasi janë arkëtuar rreth 32.4 miliardë lekë, nga 33.6 miliadrë që u mblodhën një vit më parë. Ndërsa paralelisht janë rimbursuar 3.7 miliardë lekë. Me rënie prej 1.3 miliardë lekësh paraqiten edhe shpezimet publike, ku janë paguar rreth 9 miliardë lekë për muajin mars.
Elisabeta Dosku / SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.