Arkëtimet nga ALUIZNI – 35 milionë dollarë do kalohen për kompensimin e pronarëve

35 milionë dollarësh është shifra që do të mblidhet nga legalizimi i ndërtimeve informale në tre vitet e ardhshme, i cili do të përdoret për kompensimin financiar të ish pronarëve.

Scan ka zbardhur parashikimet e Qeverisë për periudhën 2018-2020 lidhur me këtë zë buxhetor. Në vitin që sapo nisi, Qeveria parashikon të arkëtojë rreth 15 milionë dollarë nga kalimi i parcelave ndërtimore në favor të ndërtuesve pa leje që legalizojnë objektet përmes ALUIZNI-t.

Në vitin 2019 dhe 2020 parashikohet të grumbullohen nga 10 milionë dollarë.

Në total, gjatë tre viteve të ardhshme, për kompensimin financiar të ish pronarëve nga buxheti i shtetit do të përdoren 136 milionë dollar.

Në Buxhetin e sapomiratuar të vitit 2018, Këshilli i Ministrave ka parashikuar fondin prej rreth 34 milionë dollarësh. Fond që do të shënojë një rritje të dukshme në vitin 2019, i cili përkon edhe me zgjedhjet lokale.

Për këtë vit, Qeveria do të vërë në dispozicion të kompensimit të pronarëve rreth 49 milionë dollar. Rritja do të jetë më modeste për në vitin 2010, kur janë parashikuar për këtë qëllim 53 milionë dollarë.

L.R/SCAN

*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.