Arkitekt interieri, kërkesa në treg – Maliqari: Për herë të parë program bachelor me 35 kuota
Hapet për herë të parë në Universitetin Politeknik të Tiranës programi Bachelor në arkitekturë interieri dhe Dizajn. Rektori i këtij universiteti, Andrea Maliqari, shprehet për televizionin SCAN se çelja e këtij programi vjen si pasojë e rritjes së kërkesave të tregut për arkitekt interier dhe Dizajn. Ky program ofroi për këtë vit akademik 35 kuota gjithsej, nga të cilat 30 janë për studentët vendas.
“Është një specifikë që lidhet edhe me atë aktualitet që ka tregu sot për një produkt arkitekti, i cili merret kryesisht me arredimin, me artitekturën e interierit dhe dizajnin. Nisur nga kjo situatë dhe nga këto kërkesa që ka tregu sot, Fakulteti i Arkitekturës ka kaluar të gjitha procedurat e miratimit e Bachelorit në arkitekturë interieri dhe dizajn”, tha Maliqari.
Programi më i ri në UPT është pjesë e Arkitekturës, Urbanistikës dhe Dizajnit, të cilat për këtë vit ofruan 190 kuota gjithsej, nga ku 33 janë ende të lira për regjistrime në raundin e dytë.
Nertila Doko/SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.