Arrestohen inspektorët e Tatimeve, Policia: U merrnin rryshfet bizneseve deri në 200 mijë lekë. Reagon Drejtoria e Përgjithshme e Tatimeve

Strukturat e Hetimit të Krimit Ekonomik e Financiar në Durrës, në bashkëpunim me Prokurorinë e Rrethit Gjyqësor Durrës, kanë arrestuar 2 punonjës të tatimeve me akuzën se kanë shpërdoruar detyrën duke u marrë rryshfet bizneseve. Referuar njoftimit të policisë, pas një hetimi proaktiv 3 mujor u arrestuan në flagrancë shtetasit:

• G.E, 29 vjeç, banues në Tiranë;
• A. K, 37 vjeç,banues në Tiranë.

Gjithashtu është shpallur në kërkim dhe po punohet për kapjen e shtetasit P.H. 43 vjeç.

“Në ngarkim të tre shtetasve të mësipërm, me detyrë Inspektor të Hetimit Tatimor në Drejtorinë Rajonale të Tatim Taksave Tiranë Gjykata e Shkallës së Parë Durrës kishte vendosur masën e sigurisë “Arrest me burg” per nenet 259, 244, 248 e 25 të Kodit Penal. Të lart-përmendurit në bashkëpunim me njëri-tjetrin duke shpërdoruar detyrën kërkonin dhe ju merrnin ryshfet bizneseve gjatë inspektimit të tyre, shuma në vlera monetare që shkonin deri në 200 000 lek për çdo rast. Vijon puna për kapjen e shtetasit të shpallur në kërkim” njofton policia.

Pas arrestimeve ka reaguar edhe Drejtoria e Përgjithshme e Tatimeve që ka larguar menjëherë nga detyra tre punonjësit.

“Drejtoria e Përgjithshme e Tatimeve ka larguar menjëherë nga detyra 3 punonjës, inspektorë të sektorit të Zbatimit pranë Drejtorisë së Hetimit Tatimor Rajoni Qendror Tiranë, të cilët u ndaluan dje, me akuzën se kanë konsumuar veprën penale të “Shpërdorimit të detyrës” dhe “Korrupsionit pasiv të personave, që ushtrojnë funksione publike”. Drejtoria e Përgjithshme e Tatimeve, i bën thirrje çdo punonjësi të administratës tatimore të zbatojë me rigorozitet vetëm ligjin, në respekt të punës dhe institucionit , gjithashtu inkurajojmë bizneset dhe qytetarëve, për të denoncuar aktet korruptive, sjelljen jo etike dhe çdo akt të paligjshëm, gjatë ushtrimit të detyrës së punonjësve të Administratës Tatimore”njoftojnë Tatimet.

SCAN

*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.