Arsimi i lartë – 37% studiojnë për t’u bërë ekonomistë e juristë
Afro 37% e shqiptarëve që ndjekin arsimin e lartë studiojnë për t’u bërë ekonomistë apo juristë. Të dhënat e Institutit të Statistikave dëshmojnë një përqendrim të lartë në këto degë studimi, duke i bërë profilet me konkurrencën më të lartë në tregun e punës.
Statistikat që janë të disponueshme deri në vitin shkollor të mbyllur në 2016, tregojnë se afro 54 mijë studentë ndjekin arsimin e lartë për shkenca sociale, ekonomi dhe drejtësi.
Këto degë dominojnë dukshëm, megjithatë numri i tyre ka rënë disi nga viti 2013, kur patën arritur kulmin, me afro 68 mijë studentë. Sidoqoftë, kjo rënie i detyrohet mbylljes së disa prej universiteteve private në fillim të mandatit të parë që qeverisjes së Partisë Socialiste.
Kjo ka sjellë edhe një ulje të përgjithshme të numrit të studentëve, në më pak se 147 mijë, nga afro 174 mijë për vitin akademik të mbyllur në 2014. Pas shkencave shoqërore, profili i dytë më i ndjekur janë shkencat mjekësore, me afërsisht 15% të numrit të përgjithshëm të studentëve dhe ato inxhinierike me rreth 12%.
Rënie të theksuar gjatë viteve të fundit ka pësuar ndjekja e shkencave arsimore. Në vitin 2011, afro 21 % e studentëve ndiqnin shkollën për t’u bërë mësues; në vitin 2016 këto degë ndiqeshin nga më pak se 8% e totalit të studentëve.
Ersuin Shehu/SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.