Arsimi profesional, humbet interesin – Në rënie numri i regjistrimeve, ku do ndërhyhet!

Ndërsa shkalla e punëismit në radhët e të diplomuarve në arsimin e mesëm profesional është më e lartë se ata që mbarojnë arsimin e mesëm të përgjithshëm, numri i të rinjve që ndjekin shkollat profesionale ka ardhur në rënie. Sipas shifrave zyrtare, regjistrimet në shkollat e mesme profesionale publike në vitin akademik 2020-2021 kanë rënë në 17,000 studentë nga 18,164 që ishin të regjistruar në vitin akdemik 2019-2020, ndërkohë që kërkesa në tregun e punës vijon të rritet.

Në dokumentin e reformave ekonomike 2022-2024 të hartuar nga qeveria thuhet se tendencat demografike janë kryesisht shkaku i rënies, promovimi i Agjencisë së Formimit Profesional-së ka nevojë për fokus të shtuar, por më e rëndësishmja, investimet infrastrukturore në sektor duhet të rriten në përputhje me planin e veprimit për optimizimin e ofruesve të AFP-së, veçanërisht në ofruesit që përballen me kërkesë të lartë, ku veccohet rajoni qendror i Shqipërisë). Në këtë pikë kritikohen zonat rurale, të cilat sipas dokumentit nuk kanë avancuar shumë me përpjekjet e tyre për të përmirësuar infrastrukturën e AFP-së që është nën përgjegjësinë e tyre, si konviktet apo shkollat.

Për këtë qëllim, në tre vjecarin e ardhshëm synohet të ndërhyhet në optimizimin e ofruesve publikë të arsimit dhe formimit profesional, përmes përmirësimit të infrastrukturës dhe trajnimeve si dhe rritjen e bashkëpunimit me komunitetin e biznesit , i cili synohet duhet të shtrihet në të gjitha fushat që ofrojnë shkollat profesionale.  Vetëm në 8 muajt e parë të vitit, për arsimin profesional janë shpenzuar nga buxheti i shtetit 1.5 miliardë lekë.

Elisabeta Dosku / SCAN

*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.