Arsimi profesional – Konkurset e pranimit për aplikantët do të zhvillohen në 11-27 gusht
Të gjithë ata aplikantë të cilët do të konkurrojnë për të vijuar studimet në arsimin profesional, do të zhvillojnë testimin për tu pranuar në datë 11 deri më 27 gusht të 2018-ës. Këshilli i Ministrave ka miratuar udhëzimin e Ministrisë së Arsimit, Sportit dhe Rinisë të datës 20 qershor 2018 për një ndryshim të udhëzimit të datës 21 maj të këtij viti lidhur me procedurat e aplikimit dhe të regjistrimit të aplikantëve në programet e ciklit të parë të studimeve me karakter profesional, si edhe në programet e integruara të ciklit të dytë, në institucionet e arsimit të lartë për vitin akademik 2018-2019.
Sipas këtij udhëzimi i cili tashmë ka hyrë në fuqi, Institucionet e Arsimit të Lartë, të cilat zhvillojnë këto konkurse pranimi në datat e sipërpërmendura duhet të afishojnë listat me emrat e aplikantëve pranë mjediseve të tyre dhe në faqet zyrtare elektronike përkatëse që në datën 10 gusht.
Nertila Doko/SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.