Arsyet pse vizitohet Shqipëria – Rriten ndjeshëm ata që vijnë për pushime dhe biznes

Pjesa dërrmuese e të huajve që vijnë në Shqipëri kanë si qëllim kryesor pushimet. Një pjesë e madhe e tyre, siç dihet, janë shqiptarë të cilët jetojnë jashtë vendit, apo shqiptarë nga Kosova.

Këta, pra ata që vijnë me pushime janë rritur me 23.6% gjatë vitit që sapo u mbyll, pra një rritje tejet domethënëse. Ndërkohë, në vend të dytë janë ata që kalojnë tranzit në Shqipëri. Më pas ndjekin ata për qëllime biznesi dhe pune, që janë 68527 gjatë të gjithë vitit të kaluar, thonë të dhënat më të fundit të Instat.

Gjatë muajit të fundit të vitit të kaluar, vizitat me qëllime biznesi apo profesionale kanë pësuar një rënie me 10% në krahasim me të njëjtën periudhë të vitit paraardhës Kështu, të dhënat e institutit të statistikave tregojnë se, këta të fundit zënë vetëm 1.7% të totalit të hyrjeve të shtetasve të huaj në vendin tonë.

Gjithsesi, kemi të bëjmë me një rritje të ndjeshme, me 16.6% në krahasim me vitin paraardhës. Nga të dhënat e Instat vihet re gjithashtu një përgjysmim i numrit të vizitave në Shqipëri për qëllime fetare gjatë 11 muajve të parë të vitit, ose më saktë një rënie me 41.9%.

Këto udhëtime lidhen kryesisht me misionet fetare në vendin tonë.  Sa i përket hyrjeve për qëllime shëndetësore, shifra mbetet thuajse e pandryshuar, paçka se regjistrohet një rënie me 4.4%.

Gjithsesi, ajo që bie më së shumti në sy nga shifrat e Instat është rënia e ndjeshme e numrit të hyrjeve një ditore përgjatë 12 muajve të vitit të kaluar, nga rreth 507 mijë gjatë vitit të kaluar, në 292.978 këtë vit.

Kjo përkthehet në një rënie prej 42.2% në krahasim me një vit më parë. Turizmi ditor në pjesën dërrmuese i referohet hyrjeve të turistëve nga vendet fqinje gjatë fundjavave.

Roel Korkuti/SCAN

*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.