Arta Marku kalon Vetting-un – Pranë konfirmimit gjyqtarja Alma Brati, pasaktësi të vogla
Kryeprokurorja e Përkohshme Arta Marku ka kaluar me sukses testin e Vetting-ut duke u konfirmuar në detyrë nga Komisioni i Pavarur i Kualifikimit. Trupa e vlerësoi Markun të përshtatshme për të vijuar detyrën e magjistrates duke iu referuar të tre komponentëve të Vetting-ut: pasurinë, integritetin dhe aftësitë profesionale. E vemja pikë diskutimi për karrierën e Arta Markut ishte një masë arresti e dhënë në vitin 2016, e cila u konsiderua mjaft e ashpër nga Trupa Gjykuese, ashtu si dhe përfaqësuesi i ONM. Atë vit, Marku kishte vendosur masën e arrestit prej dy javësh në paraburgim për një person të ndaluar teksa drejtonte mjetin në gjendje të dehur.
Ndërkohë që të njëjtin fat duket se do të ketë edhe gjyqtarja e Tiranës Alma Brati, e cila zhvilloi po të mërkurën paradite seancën dëgjimorë përpara Komisionit të Pavarur të Kualifikimit. Asaj iu desh të jepte shpjegime për një apartament 100.1 m, në Tiranë me vlerë 80 mije euro, i blerë përmes një kredie prej 50 mije eurosh, si dhe huaje prej 25 mije eurosh e marrë nga tezja dhe e shlyer në 2016. Ajo zotëron gjithashtu edhe ¼ e një shtëpie në Durrës e përbërë nga 179 metra truall dhe 85.4 metra ndërtim, blere 1.9 mln lekë, në bashkëpronësi me ish bashkëshortin dhe prindërit. Ajo zotëron edhe një mjet të tipit Mazda, blerë 19.500 euro me leasing.
Sipas Komisionit të Pavarur të Kualifikimit, gjatë hetimit të pasurisë së saj janë vërejtur pasaktësi dhe diferenca të vogla mes të ardhurave e shpenzimeve, të cilat, gjithsesi nuk përbënin bazë për të krijuar dyshime për fshehje të pasurisë.
Vetë gjyqtarja shpjegoi se një pjesë e pasaktësive vijnë për shkak të pamundësisë për ofruar informacion të saktë lidhur me të ardhurat e ish bashkëshortit, me të cilin ka pasur edhe një proces gjyqësor për pensionin ushqimor të fëmijëve.
Pas shpjegimeve të Gjyqtares, Trupa u tërhoq për të marrë vendimin përfundimtar për konfirmimin apo shkarkimin e saj nga detyra, i cili do të bëhet publik më 5 korrik.
Lorenc Rabeta/SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.