Asetet ruse për të rindërtuar Ukrainën – Pasuritë e sekuestruara të oligarkëve rusë në BE, në një fond për Kievin

Lituania, Sllovakia, Letonia dhe Estonia kërkojnë konfiskimin e aseteve ruse të bllokuara nga Bashkimi Europian për të financuar rindërtimin e Ukrainës pas pushtimit rus. Kërkesa u bë me anë të një letre të firmosur nga të katër vendet.

Në 3 maj Ukraina deklaroi shumën totale që i nevojitet për rindërtimin e vendit të shkatërruar nga Rusia: rreth 600 miliard dollarë. Por me luftën ende në vijim, kjo shumë pritet të rritet dhe më shumë.

Një pjesë e rëndësishme e kostos për rindërtimin e Ukrainës, përfshirë këtë dhe dëmshpërblimet për viktimat e sulmeve të ushtarëve rusë, duhet të mbulohen nga Rusia, shkruhej më tej në letër. Sipas agjencisë së lajmeve Reutesr, 27 vendeve anëtare gjithashtu iu kërkohet që të përgatisin një paketë të re sanksionesh kundër Moskës. Sipas këtyre katër vendeve, nëse rusia nuk ndalon sulmin ushtarak kundër Ukrainës, atëherë nuk duhet të ketë më asnjë lidhje ekonomike mes Rusisë dhe Bashkimit Europian. Duhet të bëhet e mundur që asnjë preh burimeve financiare, produkteve apo shërbimeve të kontribuojë për makinerinë ruse të luftës.

Katër vendet theksojnë në letrën e tyre se BE dhe vende të tjera që ndjekin linjën e saj kanë bllokuar asete që i përkasin individëve rusë dhe enteve si dhe rreth 300 miliard dollarë rë rezervave të bankës qendrore.
Tashmë duhen identifikuar rrugë ligjore për të perfeksionuar përdorimin e këtyre parave si një burim për financimin e rezistencës ukrainase ndaj agresionit rus por dhe për irndërtimin e vendit pas përfundimit të luftës.

Komisioni Europian tha se do të kontrollonte nëse ishte e mundur të konfiskoheshin asetet e ngrira ruse për të financuar Ukrainën në përputhje me ligjet kombëtare dhe ato të BE-së, por nuk përmendi rezervat e bankës qendrore.

Sipas zëdhënësit të komisionit europian ngrirja e aseteve është ndryshe nga sekuestrimi i tyre. Në pjesën më të madhe të shteteve anëtare, kjo nuk është e mundur dhe duhet një dënim penal për konfiskimin e pasurive. Gjithashtu, në aspektin ligjor, subjektet private dhe asetet e bankës qendrore nuk janë të njëjta.

Ai tha se Komisioni do të paraqesë një propozim për ta cilësuar shkeljen e masave kufizuese një krim në BE, si dhe një propozim për të rishikuar dhe forcuar rregullat aktuale të BE-së për konfiskimin dhe për të forcuar sistemin e rikuperimit dhe konfiskimit të aseteve.

SCAN

*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.