Ashpërsohet ligji për administrimin e pallateve – Administrator për çdo objekt me mbi 4 bashkëpronarë. Kush nuk paguan çohet në përmbarim!
Ministria e Financave ka propozuar një seri ndryshimesh në ligjin për administrimin e pallateve, duke përfshirë në këtë kuadër regullator edhe zonat rezidenciale e vilat, por edhe duke u dhënë më shumë kompetenca administratorëve apo kryesive të banorëve, veçanërisht në trajtimin e banorëve që nuk përmbushin detyrimet financiare.
Sipas shpjegimit të Ministrisë në relacionin shoqërues, sjell një seri ndryshimesh të rëndësishme. Saktësimi i konceptit të asamblesë së bashkëpronarëve, me qëllim evitimin e situatave të paqarta të verifikuara në praktikë, ku në një ndërtesë janë krijuar disa asamble bashkëpronarësh; Saktësimi se pronarët mund të marrin pjesë personalisht në mbledhjet e asamblesë apo të autorizojnë një përfaqësues të autorizuar dhe kjo për të mos pasur pengesa në formimin e kuorumit; Përcaktimi se vendimi i asamblesë së bashkëpronarëve mbi tarifën e administrimit është titull ekzekutiv, me qëllim lehtësimin e vendimmarrjes për procedura që kërkojnë të ndiqen me shpejtësi dhe efikasitet gjatë punës së përditshme të cilat me ligjin aktual kanë qenë penalizuese; dhe së fundmi; Parashikimi i rregullimit ligjor për ndërtesat që paraqesin rrezik shembjeje.
“Bashkëpronarët kanë detyrimin të caktojnë një administrator, sipas këtij ligji, në rast se ndërtesa ka në bashkëpronësi më shumë se katër bashkëpronarë. Nëse një vendim i tillë nuk merret nga asambleja e bashkëpronarëve apo kryesia, kompetencën për caktimin e administratorit e ka kryetari i njësisë administrative.”, thekson një prej ndryshimeve.
“Përveç kompetencave të përcaktuara në këtë ligj, kryesia ka edhe këto kompetenca: a) autorizon administratorin për të kërkuar lëshimin e urdhrit të ekzekutimit, sipas pikës 2 të nenit 27 të këtij ligji, si dhe për ndjekjen deri në fund të ekzekutimit, për mospagesën e tarifës së administrimit dhe kamat vonesave përkatëse nga ndonjëri prej bashkëpronarëve”, thekson një prej neneve të reja të ligjit.
Lorenc Rabeta / SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.